資訊架構

專門研究資訊架構嘅 HCI 研究者望住呢個檔案目錄，可能會諗：用家望住呢個目錄，係咪能夠一眼就睇得出自己想要嘅快勞喺邊？

資訊架構，粵拼：zi1 seon3 gaa3 kau3/gau3，又可以譯做訊息架構，屬於資訊相關嘅設計，包括咗設計資訊要點樣組織、帶領用家瀏覽、落標籤同埋搜尋等等。資訊相關系統可以包括網頁同軟件傳達資訊嘅方式。資訊架構做嘅設計，目的係想令啲系統變得更有效率，最常見嘅係想將資訊設計到對用家嚟講易明。

資訊架構個諗頭可以追溯返到去一九七〇年代中。而廿一世紀初嘅資訊架構，可以想像成四方面嘅思考：組織講到內容要點樣分類同結構化，例如討論啲 point 應該跟字母順序排定係跟語義嚟排；導航負責引導用家喺資訊結構之間穿梭，例如選單同超連結嘅設計；標籤就講到要點樣標示系統嘅唔同元素，最好用家一睇到啲頁面同超連結嘅標籤就知道要點樣瀏覽；搜尋就要容許用家用詞彙，直接摷想要嘅資訊。

一般嚟講，資訊架構研究隸屬人機互動，會當係用家體驗嘅重要一部份。不過資訊架構方面嘅研究相當跨學科，成日都會用到圖書館學同埋認知心理學方面嘅知識。

學科定位

睇埋：電腦數據、分類學同知識

資訊架構個名，嚟自英文：information architecture，簡稱 IA，呢個詞可以大致理解為建構資訊嘅學問噉嘅意思。

莫維同羅森菲德 (暫譯) 呢兩位美國嘅用家體驗專家，喺二〇〇六年寫書，為資訊架構呢個概念提供咗幾個可能嘅定義，包括：

• 對資訊環境嘅結構嘅設計
• 網站同內聯網嘅組織、標籤、搜尋同埋引導系統
• 一套藝術，亦係一套科學，專門塑造資訊產品以及體驗，用嚟支援可用度，亦都要令到啲資訊易搵。
• 一個實踐社群，專注於將設計同架構嘅原則用落去數碼空間當中。

至於佢哋點解話資訊架構既係藝術又係科學：

資訊架構實踐嗰環，永遠冇可能單靠數值表達到。含糊同複雜之處太多。資訊架構工作者要用到經驗、直覺同埋創造力。

對於資訊架構概念嘅具體定義，二〇二〇年代嘅學界仍然有爭議。

四大系統

睇埋：用家體驗

根據莫維同羅森菲德 (暫譯) 個諗法，資訊架構有四大重要部份。

• 組織系統：由組織方案同結構組成；組織方案描述點解要將內容噉樣分類，例如點解要按標題嘅字母順序嚟同啲文章排先後；而至於組織結構就要界定唔同內容組之間嘅關係，譬如等級結構呀噉。組織方案好多時都有啲主觀，例如想像有人同啲文章分類，選擇按文章嘅主題嚟分。
• 導航系統：有關組織同導航之間有咩啦掕，有人打咗個比喻，話結構同組織係喺度起房，而導航就係講緊要加門同窗；導航系統嘅設計，幫助用家喺資訊結構之中穿梭，例子有選單呀噉，導航系統可以係內嵌喺個系統裡便又得，額外加落去都得。
• 標籤系統：標籤系統講點樣同啲內容落標籤，等用家一睇就知每件內容係乜，簡單嘅例子有標題、關鍵詞等等；標籤系統嘅設計都有一定嘅技巧，例如用家通常會當標籤係導航用嘅提示，所以唔少設計師都認為標籤要避免用行話。
• 搜尋系統：搜尋同導航可以互相配合，俾用家輸入特定嘅字詞或詞組嚟搵返相關資料；唔係所有系統都需要搜尋功能，通常淨係有返咁上下大而且內容變化頻繁嘅系統先至需要搜尋功能，例如係維基百科就需要呢種功能。

相關技能

• 軟件工程
• 用家體驗設計
• 網頁開發
• 內容策略
• 知識管理
• 平面設計

相關學科

• 人機互動
• 認知心理學
• 圖書館學
• 資訊理論

睇埋

• 維基百科
• Metadata
• 儀表板
• 資訊過多

文獻

• （英文）Guizani M. A Decade of Information Architecture in HCI: A Systematic Literature Review. arXiv preprint arXiv:2202.13412. 2022 Feb 27，呢篇文屬於系統綜述，引用咗一大拃探討 IA 嘅文獻。
• （英文）Morville, P., & Rosenfeld, L. (2006). Information architecture for the World Wide Web: Designing large-scale web sites. " O'Reilly Media, Inc."，喺廿一世紀初呢本書被譽為 IA 界嘅「聖經」。
• （英文）Toms, E. G. (2002). Information interaction: Providing a framework for information architecture. Journal of the American society for information science and technology, 53(10), 855-862.