路西法
路西法（拉丁文、英文：Lucifer），係基督教同猶太教嘅名詞，出現喺《以賽亞書》第14章第12節，通常指被逐出天堂前嘅魔鬼或者撒旦。後世文學將佢描述做墮天使，原本係最靚最奪目嘅天使，後嚟背叛上帝發動戰爭，最後戰敗墮落到地獄。
「路西法」（Lucifer）呢個名出現喺《以賽亞書》第14章第12節，希伯來語係「הֵילֵל」（helel），而喺聖經入面，呢個字只出現過呢一次。
七十士譯本將佢翻譯做古希臘語「ἑωσφόρος」（heōsphoros），字面意思係黎明使者，即係黎明時分出現嘅金星，又稱啟明星。武加大譯本將佢譯做拉丁語「Lucifer」，由lux（光，所有格lucis）同ferre（帶來）所組成，意思係「光之使者」。