迷你兵團

出自維基百科,自由嘅百科全書

迷你兵團》(Minions)係一套2015年美國動畫電影,係《壞蛋獎門人》同《壞蛋獎門人2》嘅外傳,故仔主角係迷你兵加分(Kevin)、小小超(Stuart)同阿卜(Bob)。

劇情[編輯]

套電影講述一眾迷你兵點樣由盤古開天時期,由一個個黃色嘅有機體,隨­著時間漸漸演化成迷你兵種族,以及點樣去搵佢哋邪惡主人嘅故事。根據電影嘅角色設定,迷你兵終身都係要服侍最邪惡嘅主人。佢哋先後揀咗暴龍、拿破崙、殭屍等主人去跟從,但都唔小心俾佢哋害死晒。迷你兵發現自己無主人可以服侍,變得鬱鬱寡歡。喺呢個時候,其中一隻迷你兵,加分(Kevin)提出一個偉大嘅計劃,就係出發尋找新嘅邪惡領袖。出發之前,佢喺一眾迷你兵入面揀選咗另外兩隻迷你兵,就係小小超(Stuart)同埋阿卜(Bob)。加分帶住小小超同埋阿卜去美國紐約,並喺機緣巧合之下,前往奧蘭多參加「壞蛋博覽會」(Villain-Con),尋找最惡名昭彰嘅壞蛋。佢哋因找到主人:煞天嬌(珊迪娜·布洛配音)——世界女魔頭翹楚。女魔頭煞天嬌由細到大都希望擁有英女王嘅王冠,於是就派迷你兵去偷。結果喺爭奪過程中,阿卜無意間竟然成功拔出傳說中嘅石中劍,於是被加冕為王。煞天嬌好嬲,叫阿卜傳位俾佢自己之後,就監禁同埋想用酷刑對付佢哋。但係迷你兵都唔明發生咩事,仲試圖喺佢加冕時向佢道歉,被煞天嬌誤以為佢哋又要黎搶王冠。

經過一輪爭鬥,迷你兵打敗煞天嬌,取回王冠,讓英國女王復位。點知臨到最後,煞天嬌突然出現又想偷王冠,結果個王冠就俾年輕嘅犀利哥奪走,從此所有迷你兵就追隨犀利哥作為佢哋嘅新主人喇。