郭亞倫

出自維基百科,自由嘅百科全書
Jump to navigation Jump to search
郭亞倫被溫哥華白浪足球會聘為白浪二隊總教練之後接受記者訪問。

郭亞倫(Alan Keith Koch,1975年4月30號—)係一位德裔南非足球員同足球教練,曾經係南非國家青年足球隊嘅隊員[1]

球員生涯[編輯]

郭亞倫喺南非德班出世,後來去咗德班西城男子高中(Westville Boy's High School)讀書並且開始打球。1992年,郭亞倫入選南非國家青年足球隊,重做埋隊長[2]。1993年,郭亞倫同南非甲組足球聯賽嘅Resevoir Hills簽約,正式開始職業生涯。1995年,郭亞倫離開南非,同德國高級足球聯賽嘅普魯士古勒菲(KTSV Preussen Krefeld)簽約,之後就喺德國打咗一段時間球,並且先後效力過華騰沙伊德09(Wattenscheid 09)同埋于亞丁根(KFC Uerdingen 05)。1996年,郭亞倫去到加拿大卑詩省西門菲沙大學求學,同時為大學男子足球隊出賽。2000年,郭亞倫大學畢業之後轉投愛爾蘭足球聯賽嘅廉尼足會(Limerick FC),但係到咗第二年就發現心臟有問題,喺醫生嘅建議之下,郭亞倫決定掛靴[3]

教練生涯[編輯]

美國[編輯]

掛靴之後,郭亞倫去到美國全美大學體育協會(NCAA)乙組嘅中西州立大學(Midwestern State University)攻讀碩士學位,同時擔任大學男子足球隊嘅助理教練。佢擔任助理教練嘅第一年就帶領中西州立大學打入全國總決賽八強。之後佢又繼續做咗兩年助理教練,球隊嘅成績分別係12勝6負同13勝3負2和。2005年,郭亞倫碩士學位畢業之後,即刻就被全國高校校際體育協會(NAIA)嘅卑卡大學(Baker University)請咗去做男子足球主教練。

郭亞倫喺卑卡大學做咗兩年主教練,球隊成績分別係9勝9負同13勝7負。2007年,郭亞倫帶領卑卡大學殺入全國高校校際體育協會第五大區半決賽。之後,西門菲沙大學由於男子足球隊主教練辭職而邀請郭亞倫接任主教練,郭亞倫於是返咗去加拿大。

加拿大[編輯]

郭亞倫接任西門菲沙大學主教練之後,先係喺2008同2009年獲得獨立院校賽區(全國高校校際體育協會)年度最佳教練獎[4],然後又從2010年開始,連續3年獲得大西北賽區(全美大學體育協會)年度最佳教練獎[5]。2010年,西門菲沙大學男子足球隊喺加入全美大學體育協會乙組嘅第一年,就爆冷提前一輪奪得大西北賽區冠軍,之後又連續兩年提前奪得賽區冠軍。2011年9月,西門菲沙大學男子足球隊成為第一支登上全聯盟人氣排名前25嘅非美國球隊,同年10更加成為第一支全聯盟人氣排名第一嘅非美國球隊[6]。2012年,西門菲沙大學男子足球隊成為第一支殺入全國半決賽嘅非美國球隊,雖然喺四強賽止咗步,但係就連《紐約時報》都大篇幅咁報導咗西門菲沙大學嘅決賽歷程[7]。賽季結束之後,郭亞倫被美國全國足球教練協會選為「大區年度最佳教練」。

2009年,郭亞倫亦都曾經執教過溫哥華白浪女子隊,但係最後女子隊常規賽排名第5,剛剛好同季後賽失之交臂。

2013年,郭亞倫執教出征馬卡比猶太人運動會嘅加拿大男子馬卡比足球隊[8],奪得銅牌[9]

2015年1月30號,溫哥華白浪足球會宣佈聘請郭亞倫擔任白浪二隊嘅主教練[10]。擔任西門菲沙大學主教練期間,郭亞倫一共帶領球隊奪得四次賽區冠軍同兩次大區冠軍,同埋兩次殺入乙組全國半決賽。

個人生活[編輯]

郭亞倫手上有好多張教練證書,包括美國全國教練協會頂級證書同歐洲足協B級證書。目前佢準備考歐洲足協A級教練證書。

郭亞倫目前住喺卑詩省北溫哥華市。佢識講英文、德文同埋南非尼德蘭文。

參考[編輯]

  1. "Westville Boys' High School". (原先內容喺2008年6月26號歸檔). 喺2013年4月27號搵到. 
  2. "存档副本". (原先內容喺2008年6月26號歸檔). 喺2013年4月27號搵到. 
  3. [1]
  4. "Association of Independent Institutions News". Aiisports.com. 23 November 2010. 喺2012-02-21搵到. 
  5. "存档副本" (PDF). (原先內容 (PDF)喺2010年11月24號歸檔). 喺2013年4月27號搵到. 
  6. "存档副本". (原先內容喺2012年6月12號歸檔). 喺2013年4月27號搵到. 
  7. Simon Fraser carries Canadian flag to NCAA soccer final four
  8. http://www.soccernewsday.com/canada/r/312597/sfu-coach-alan-koch-to-coach-canada-at-maccabi-games[失咗效嘅鏈]
  9. "Simon Fraser University – Clan members bring home Maccabi Games bronze". Athletics.sfu.ca. 8 January 2013. 喺10 October 2013搵到. 
  10. "Whitecaps FC name Alan Koch WFC2 head coach". Whitecaps FC. January 30, 2015. (原先內容喺二月 2, 2015歸檔). 喺January 30, 2015搵到.  檢查日期值喺: |archive-date= (詳情)