陳易希

陳易希，BBS（英文：Stark Chan Yik Hei，1989年 10月17號—）係香港少年發明家，傳媒叫佢做「明日之星」。中學畢業於新界屯門中華基督教會譚李麗芬紀念中學，曾經被香港科技大學破格取錄。由於佢嘅公開試成績根本唔足以升大學，可能有某啲網民唔抵得，同佢改咗個花名叫「陳十二」，用嚟笑佢會考得十二分。係香港史上最後生嘅銅紫荊星章得主。

簡介

2004年，陳易希喺香港新一代文化協會嘅帶領下遠赴美國，憑住佢同佢隊友嘅發明——一個智能家居監察用嘅小型三輪機械車「智能保安機械人」，得到第55屆美國英特爾國際科學與工程大獎賽物理學二等獎。根據慣例，每個獲得二等獎或以上嘅人都會得到一粒以佢命名嘅小行星。所以喺2005年，美國麻省理工大學林肯實驗室特登將一粒編號係20780嘅小行星以佢個名命名，成為咁多位獲命名小行星嘅香港人中年紀最細嘅一位；此外，香港嘅傳媒叫佢做「明日之星」。

2005年12月30號，佢得到香港電台第二台早晨節目「晨光第一線」2005年風雲少年嘅殊榮。另外喺香港年報《香港2005》之中，陳易希被稱讚為香港學生嘅典範。

由於佢喺香港青少年科學界嘅成就，所以得到美國加州大學洛杉磯分校嘅邀請，喺2006年暑假期間去佢哋嗰度接受為期兩個月嘅科學課程，同年8月19號完成返香港。此外，佢亦得到香港發明家陳克敏嘅邀請加入新世紀科技做程式開發員。

2006年5月26號，佢被香港科技大學破格收咗，讀電子及計算機工程學士課程，中五畢業後可以唔使讀兩年中學預科課程而直接入大學（之但係，佢要讀完一年大學先修班先至可以讀大學一年級），佢亦係科大創校十五年嚟，首次錄取嘅中五畢業生。不過噉樣做引起咗社會各界嘅爭議，因為科大決定破格收陳易希嗰陣，會考重有一科英文會話未考；而因為香港科技大學收咗佢，佢亦決定放棄應考英文口試，令自己英文科肥佬。同年7月，陳易希喺香港書展發表佢自傳嘅新書名為《摘星少年陳易希》，嗰本書喺最佳銷售榜佔咗一席位。

2006年10月，陳易希嘅一款「協盲產品」智能杯由肯雅奧運金牌失明跑手尹約基首先試用。尹約基話件嘢令佢覺得好興奮同神奇，而且重希望所有盲人都可以受惠。但有網民指嗰件嘢抄襲內地專利產品「盲人水杯」。《東方日報》喺10月13號引述網上討論區嘅留言，指嗰件嘢無論喺設計意念或者製作方面，都同大陸嘅龍口科技局專利產品「盲人水杯」一模一樣。兩件嘢都係靠接通杯內電路至杯底嘅發聲裝置，話畀使用者知個杯已經斟滿水；有網民重話智能杯同出年（2007年）中學會考電子與電學設計作業其中一份功課，水粒檢知器設計相同。陳易希雖就話無參考過嗰件內地發明，但好明顯一般中五生都做得到嘞。

會考嘅表現

2006年8月9號，香港中學會考放榜。但陳易希當時唔喺香港，無話個成績畀人知。後來，網上啲人吹水，話陳易希會考得三分，重幫佢改咗「三分王」呢個花名。

直到8月21號，陳易希喺一個公開活動證實自己會考有12分（用最好嗰六科嚟計），肥咗中文同英文（課程甲），電腦與資訊科技科E，數學D，化學D，物理C，圖像傳意B。喺香港，要升中六，中英文一定要合格，所以正常嚟講，陳易希根本無可能升中六，但科大都係堅持收佢，令外間議論紛紛。科大校長朱經武就話收佢係因為佢喺科技創新方面嘅表現，重會為佢提供特別輔導，等佢可以適應大學生活。[1]、[2]

積極參政

2011年1月，陳易希加入新民黨，2015年，佢亦加入政賢力量，並成為政賢力量顧問團成員之一。

出面網頁

〈港學生名揚星際　發明機械人　小行星命名〉，香港《成報》，2005年11月2號
〈SIM卡代身份證　有提款八達通功能　少年發明家鑽研智能手機〉，香港《太陽報》，2004年9月27號
〈国際学生科学技術博で２等賞。小惑星に僕の名前。‎〉，日本《讀賣新聞》兒童版，2006年2月7號
〈陳易希中五畢業入大學〉，香港《明報》，2006年5月26號
〈陳易希會考得3分？〉，香港《東方日報》，2006年8月16號
〈陳易希會考僅得12分〉，香港《明報》，2006年8月21號
〈請祝福「摘星少年」〉，香港《蘋果日報》A30頁論壇版，2006年8月25號