電子煙

其中一款電子煙

多款唔同形狀嘅電子煙

電子煙（英文：Electronic cigarette）係電子尼古丁傳送系統或電子非尼古丁傳送系統，並唔會燃燒或使用煙草，通過加熱一種溶液傳送氣霧畀使用者吸用。傳送系統由電子汽化系統、充電裝置、電壓控制組件同溶液組合而成。主要成分包括：尼古丁、丙二醇，可能重有甘油同添味劑。電子煙所用嘅液體同釋放物亦含有其他化學物質，其中有啲化學物質被視為有毒物質。部分外型同一般捲煙相似，亦有設計成原子筆、鋼筆、USB記憶體或其他形狀。電子煙嘅口味接近8,000種，例如生果、汽水、朱古力、薄荷等，以滿足青少年貪新鮮同好奇嘅心態。

工作原理

所有電子煙都必須含有電子煙油。煙油中含有丙二醇（PG）、植物甘油（VG）、調味劑。丙二醇同植物甘油會產生蒸汽，一般嚟講更高嘅植物甘油（VG）會產生更大嘅煙霧，並且令到煙油更加濃稠，而更高比例嘅丙二醇（PG）就同佢相反。通常喺任何一款設備內部都有一個吸油材料或填塞物，佢吸收煙油並保持發熱元件濕潤。加熱元件通常係由發熱絲所構成嘅線圈，當電子煙通電擊發嗰陣，線圈加熱電子煙油，產生類似煙霧嘅蒸汽。

電子煙對身體嘅影響

• 有研究證實電子煙含有有毒物質，其中包括丙烯乙二醇、甘油同致癌物質例如乙醛、甲醛等，有害健康。
• 有電子煙經過測試後，發現含有多種有害物質，包括甲醛、多環芳香烴（PAHs）及多溴聯苯醚（PBDEs）等，其中甲醛同多環芳香烴係已知嘅致癌物，多溴聯苯醚會干擾甲狀腺分泌同影響生殖能力同胎兒發展。

電子煙法例

香港

• 根據香港《藥劑業及毒藥條例》（第138章），若果電子煙含有尼古丁，就會被界定為藥劑製品，必須獲得香港藥劑業及毒藥管理局嘅註冊先至可喺香港銷售或分銷。
• 根據《吸煙（公眾衞生）條例》，喺禁煙區使用電子煙亦屬違法。
• 搭飛機嘅行李入面並冇明文規定可唔可以有電子煙，但係就唔可以有「容易燃燒嘅液體」。

2021年10月21號，香港立法會以32票贊成、3票反對、2票棄權，三讀通過《2019年吸煙（公眾衞生）（修訂）條例》，全面禁售電子煙，並喺2022年4月30號開始生效。

睇埋

• 加熱煙