音節文字

日文書寫用嘅假名有音節文字嘅特徵，每個符號都代表一款音節。

音節文字（粵音：jam1 zit3 man4 zi6；日文：音節文字／おんせつもじ ^{on setsu mo ji}）係表音文字嘅一種，一個音節對應一個字符。喺一套音節文字系統裡便，一個符號通常包括一個可選嘅輔音加上一個元音，即係一個 CV（輔音+元音）或者 V 噉嘅音節，亦有音節文字系統係有埋其他拼音配搭嘅，好似 CVC、CV-聲調同埋 C（通常係音節尾嘅鼻音）呀噉。譬如日文書寫用嘅假名，就有音節文字嘅特徵。

基本概念

内文：音節

睇埋：字母系統

首先，音節文字可以用嚟同字母系統對比。字母系統係表音文字嘅一個大類，羅馬字就屬於字母系統呢種類型，英文、德文、法文同葡文等西歐嘅語言傳統上都係用羅馬字寫嘅，而包括粵語同客家話在內嘅多種漢語都有齊晒羅馬化方案，當中粵語就有粵拼同耶魯拼音。羅馬字每隻字母都係表示緊某個元音或者輔音，而且元音同輔音地位同等，兩者都能夠自成符號：

羅馬字	傾向寫咩音（IPA）	英文例子	粵語例子
A /a	元音 /a/、/eɪ/	car，/kɑː/（「汽車」）	kaa1（漢字：卡、咔）
B / b	輔音 /p/	bar，/bɑː/（「酒吧」）	baa1（漢字：巴、疤）
C / c	輔音 /k/、/s/、/t͡sʰ/	cent，/sɛnt/（「仙」）	caa1（漢字：叉、差）

音節文字都係表音文字，不過佢哋每一個符號係表示緊音節。日文用開嘅假名，就有音節文字嘅特性，舉幾個平假名做例子，每個假名掕咗相應嘅日羅同 IPA ：

う（u / [ɯ]）	き（ki / [ki]）	く（ku / [kɯ]）	の（no / [no]）	や（ya / [ja]）

如果使用日文嘅人想寫 kinou（尋日噉解）呢段語音，就可以寫做きのうki no u噉嘅樣。留意平假名每個符號都可以包含一個輔音加一個元音，而唔係好似羅馬字噉個個符號淨係對應單一嘅輔音或者元音。除此之外，亦可以睇吓阿伊努文點樣用假名嚟書寫佢哋嘅語言。

出名例子

睇埋：假名、假借同瑪雅文字

以下係日文用嘅假名五十音，睇得出每款可能音節都有一款符號對應佢：

五十音（平文式羅馬字）
	わ行 w	ら行 r	や行 y	ま行 m	は行 h	な行 n	た行 t	さ行 s	か行 k	あ行
(ん ン) n	わ ワ wa	ら ラ ra	や ヤ ya	ま マ ma	は ハ ha	な ナ na	た タ ta	さ サ sa	か カ ka	あ ア a	あ段 a
	ゐ ヰ wi	り リ ri		み ミ mi	ひ ヒ hi	に ニ ni	ち チ chi	し シ shi	き キ ki	い イ i	い段 i
		る ル ru	ゆ ユ yu	む ム mu	ふ フ fu	ぬ ヌ nu	つ ツ tsu	す ス su	く ク ku	う ウ u	う段 u
	ゑ ヱ we	れ レ re		め メ me	へ ヘ he	ね ネ ne	て テ te	せ セ se	け ケ ke	え エ e	え段 e
	を ヲ wo	ろ ロ ro	よ ヨ yo	も モ mo	ほ ホ ho	の ノ no	と ト to	そ ソ so	こ コ ko	お オ o	お段 o

睇埋

• Abugida
• 漢字
• 音拍