香港新春花車巡遊

香港新春花車巡遊

香港新春花車巡遊，正式名叫國泰航空新春國際匯演之夜（英文：Cathay Pacific International Chinese New Year Night Parade），係香港旅遊發展局喺每年農曆大年初一主辦嘅賀歲花車巡遊活動。第一次搞係1996年，初頭幾年喺晏晝搞，2004年開始改喺夜晚搞，而初頭幾年舉辦地點可以係港島添馬艦同灣仔北或者九龍尖沙嘴，2007年開始固定喺尖沙嘴搞。每年節目都由無綫電視翡翠台現場直播（2020年ViuTV諗住爭取轉播權，但最終呢一年新春慶祝活動全部取消而隨之告吹）。

2020年初，由於香港修例風波、武漢肺炎第一波疫情內外夾擊嘅關係，呢一年新春慶祝活動全部取消（包括呢個活動同埋香港賀歲煙花匯演）。

2020年12月4號，由於第四波疫情搞到港府收緊社交距離措施，旅發局宣布取消2020年香港除夕倒數煙花匯演、2021年香港新春花車巡遊。

2024年，由於港府廢除口罩令、大搞香港夜繽紛，新春花車巡遊、賀歲煙花匯演鹹魚翻生。