香雪亞洲飲料
| 類型 | 汽水廠 |
|---|---|
| 開檔 | 1946年 |
| 總部地址 |  中國廣東廣州黃埔區南崗開創大道362號 |
| 產業 | 汽水生產企業 |
| 產品 |
|
史
1946年2月喺屈臣氏汽水廠做咗好多年嘅李智揚一手創辦咗亞洲汽水廠，初期喺惠福區大德街80號（而家係越秀區大德路嘅廣東省中醫院總院範圍）開搞。工廠喺創辦第三年向東搬到大德路298號（而家係濠畔小苑用地）繼續生產[1]。最早嗰時用嘅係部12支汽水機、一張配方、人手同大鑊，人手負責炒焦糖同熬汀秤仔啲成份出嚟，期間亦出過亞洲牌系列嘅其它飲料用飲用水、礦泉水等一系列產品。
1956年3月社會主義改造時期畀當局公私合營，重先後加埋時安、瓊南、同興、新華、回民糖果工廠等5間小型糖果廠入亞洲，改名成公私合營亞洲汽水糖果廠[2]，至1958年，已擁有5部12頭汽水機，職工350人，年產汽水1000萬樽，糖果600幾噸。改名做亞洲汽水糖果廠。1964年第一批出產嘅係亞洲蘋果汽水賣到香港嗰邊而打入咗國際市場[3]。
1966年亞洲改返做生產汽水，呢年10月去到天河路6號（大概喺而家廣州動物園南門東南角）開咗新廠，喺1967年開始運作。喺文革陣受到「剷除一切牛鬼蛇神」嘅思想影響而先後畀改名做廣州飲料二廠、廣州飲料總廠一分廠、廣州汽水廠等，一路到1984年元旦先至復名。喺1970年代推出嘅亞洲沙示汽水，曾經因為「有我咁好氣，冇我咁長氣。有我咁長氣，冇我咁好味！」呢句廣告口號令汽水賣到周街都係。1987年11月成立咗亞洲飲料集團。
1992年因中國大陸搞「借外力促發展」嘅大背景而揀咗百事可樂合資成立咗「百事亞洲飲料」企業之後，令公司跌到落冇得返轉頭嘅地步，重喺1996年搬出天河，去到廣州經濟技術開發區西區一帶搞工廠。工廠喺就快俾人唔記得嗰時，2002年先至收返亞洲汽水廠而重新成立，重將企業改名做亞洲飲料[4]。
2009年5月公司俾香雪製藥收購咗兼改名做香雪亞洲飲料公司[5]，重喺2011年1月用返舊底亞洲汽水用過嘅配方，加咗藥廠啲中藥萃取技術嚟推出返金典沙示。
2016年9月收購咗營元堂100%股份而開辟大健康新型飲料市場，期間先後推出咗豆奶同即飲酵素嘅產品[6]。間嘢宜家係廣東省十大名牌飲料廠商之一。
出品
- 亞洲沙示
- 金典沙示
- 亞洲酷橙
- 檸萌
- 亞洲豆奶
- 營元堂酵素
- 亞洲雄風
攷
- ↑ 色鲜气足味清香——亚洲汽水厂
- ↑ 与清凉甜蜜有关的现代工业遗址 廣州文史
- ↑ 〈童年現在一般可愛我要〉。《蘋果日報》。2012-04-06。
- ↑ 广州最老汽水厂能否重振雄风? 搜狐
- ↑ 国产可乐现状：走无差异山寨路 到农村去夹缝求生 鳳凰網 （2013-09-19）
- ↑ 人参提神更健康 亚洲雄风挺进功饮蓝海 北晚新视觉 （2017-06-12）