魏建功

魏建功
出世	1901年11月7號 大清江蘇海安
死	1980年2月18號 中國
國籍	中華民國  中華民國 中華人民共和國
職業	語文學者

魏建功（粵拼：ngai6 gin3 gung1；1901年11月7號—1980年2月18號），字益三（jik1 saam1），號天行（tin1 hang4），係中國嘅語言學者。佢知名於音韻學研究同新華字典嘅編篡。

生平

出生喺江蘇省海安縣（而家係南通市嘅一部分）。1921年入學北京大學，跟錢玄同等人學嘢。1925年畢業。

1927年嗰一年佢喺日本京城帝國大學做中文講師。發表咗對日本統治下嘅朝鮮嘅感想《僑韓瑣談》（收錄喺《魏建功文集》）。

1928年，佢加入咗教育部嘅國語統一籌備委員會。

1929年入職爲北京大學嘅助教（之後做副教授、教授）。抗日戰爭爆發後移轉內地，喺西南聯合大學、西南女子師範學院教書。

戰後爲咗喺臺灣普及國語（標準中文），佢任職爲臺灣省國語推行委員會嘅主任。佢嘅國語普及方針，係復活臺灣話，來排除日文嘅影響，用臺灣話做媒介來普及國語。又就任爲國立臺灣大學國語專修科主任。到1948年返去北京大學。

中華人民共和國成立後，擔任北京大學中文系主任教授嘅魏建功按照葉紹鈞嘅指示，喺1950年做咗新設嘅新華辭書社嘅社長（當年年尾新華辭書社畀人民教育出版社吸收，改爲辭書編纂室），開始咗字典編纂嘅事業。1953年初版《新華字典》出版。

喺文化大革命當初佢受到批判，但到1970年代時獲釋，做咗北京大學、清華大學批林批孔運動小組嘅顧問。文革終結後，啲人話佢有做四人幫打手嘅嫌疑而將佢收監，到1978年先釋放。

業績

關於上古音，魏建功冇自立新嘅推定音韻體系，喺1920年代時高本漢佢哋擬嘅上古音中有諸如-d、-g等濁塞音韻尾，佢發表咗《古陰陽入三聲考》（《國學季刊》2-2，1929年）同《陰陽入三聲考》（《國學季刊》2-4，1930年），反對呢啲講法。魏建功對抗高本漢嘅學說，認爲呢啲韻唔係濁塞音韻尾，而係好似-j、-w之類嘅音來收尾。有關古音嘅專著有《古音系研究》（1935年）。

魏建功亦研究韻書嘅發展史。《十韻匯編》（同劉復、羅常培共著，1936年）係收集咗敦煌等切韻系韻書而寫成嘅。

魏建功從學生時代起就做有關民謠同方言嘅研究，同劉復、白滌洲一齊調查，出咗結果《黟縣方音調查錄》（《國學季刊》4-4，1935年）。

關於辭典編纂，編《新華字典》以前，佢喺1946年編纂過中小學生用嘅細字典（未完成），《新華字典》就係以呢個細字典做元本。《新華字典》以外，又編輯咗《漢語成語小詞典》（1959年）。

《魏建功文集》（江蘇人民出版社，2001年）全五卷出版咗。

參攷文獻

• 趙金銘。〈魏建功〉. 《中國現代語言學家. 1》。河北人民出版社。頁 200～210。