腐竹

腐竹

腐皮

上湯腐竹

腐竹又叫腐皮或豆腐皮，係煮豆漿表面凝固嘅薄膜，可以新鮮食或曬乾後食，係東亞地區常見嘅嘢食原料。豆腐皮一詞最早出現喺李時珍《本草綱目》度，李時珍講，將豆漿加熱時，表面出現一層膜，將膜取出，乾咗後即得豆腐皮。

造法

將新鮮大豆浸透之後，磨漿，隔去豆腐渣，呢個時候嘅產品就係豆漿，然後煮豆漿，喺佢表面會凝固嘅一層脂肪含量較高嘅薄膜（皮），呢層皮就係腐皮。挑起薄膜後掛起。

最先撩起嘅一層皮以片狀鮮食或曬乾，叫做腐皮，最滑。腐皮之下嘅會掛起成條狀，叫做腐竹，口感次之。之後嘅平放曬乾，多數用嚟煮糖水。到較底層嘅就較粗，多數用嚟包嘢食。最底層叫做甜竹，用嚟做配料。

食用

喺唐人嘅地方，腐皮一般都會曬乾，然後再用來做煮餸嘅材料。喺日本，除咗曬乾後再泡製，亦鍾意食新鮮製成嘅腐皮，叫做「生湯葉」。生腐皮除咗可以做小食之外，亦可以將佢當做刺身點醬油食。

製成半乾，然後包住壽司一齊食。而喺味道方面，中式腐皮都係鹹食，日本人攞嚟做甜品。一般嘅腐皮壽司用嘅都係甜腐皮。喺日本包住壽司嘅一般係薄嘅油炸豆腐，並唔係腐皮。

素雞、素鴨、素火腿等嘅主要材料就係腐皮，只要加上各種香菇素菜同醬油調味後壓成條狀，就係一味唔似雞嘅雞喇。

粒狀，球狀或雞狀嘅齋雞，同樣係豆製品，但唔係呢度嘅素雞。