Talk:囉柚

{{move|臀部}}「囉柚」係市井用語。Professorjohnas (傾偈)

反對，第一，點解「臀部」比「囉柚」更加「粵語」？第二，點解「市井」要畀「優雅」差？點解讀書人有權定義知識而「大眾」冇呢？--WikiCantona (傾偈) 2012年7月9號 (一) 04:53 (UTC)[回覆]

呢篇文描述身體嘅一個部位，應該用返比較學術性嘅字眼，你唔會聽到有醫生用「囉柚」呢個詞咁核突。我覺得我哋唔應該為咗追求「粵語」而夾硬用啲咁俗嘅詞。另外，我唔覺得「臀部」係所謂「讀書人」嘅詞，正常識中文嘅人都知咩係「臀部」。Professorjohnas (傾偈) 2012年7月9號 (一) 06:58 (UTC)[回覆]

「囉柚」又何常唔係描述身體嘅一個部位，我聽唔少病人用「囉柚」，邊個會講「我個臀部痛」㗎？！「臀部」「學術性」啲？！要注意「臀部」或「囉柚」，都唔係 anatomy 裏頭嘅一個有定意嘅部份，唔似得膝頭咁，叫 articulatio genus，而睇返英文維基講膝頭，就係用平時成日用嘅 Knee 做題，而唔係 articulatio genus。所以，呢啲唔係為咗追求「粵語」而「粵語」，而係真係「粵語」，重係好常用嘅。當然我哋可以諗諗有冇個「囉柚」更加地道嘅廣東話詞，或者「囉柚」個正寫係乜，好似波蘿蓋咁。
用「市井」「核突」做理由，10% 以上嘅文嘅名都要改，蛤𧊅要改返做青蛙、朘做陰莖。閣下有冇諗過點解唔少嘅粵詞都會「不出大雅之堂」，因為就係讀死書嘅「讀書人」，懶係正統、正規；例： “「今天」我地做到最好”，“用一「瓶」就令肌膚透白...”，“家長去唔同嘅學校「叩門」”，“「下台」” --- 有今日、樽、敲門、落台唔用，反影咗有啲人點諗北方話，自以為「有文化」，踩低自己嘅母語。蠶食語言文化唔一朝嘅事，而日日咁做，直到有一日講都唔識講，講出嚟好似好「肉酸」咁.... 如果喺廣東話維基都唔企硬，不如去「中文」維基好過。--WikiCantona (傾偈) 2012年7月9號 (一) 19:09 (UTC)[回覆]

欂櫨蓋、蛤𧊅呢啲名我唔反對，但係「囉柚」、「朘」、「屎窟」呢啲我真係覺得唔係幾好，因為人哋睇到呢啲名的確有種好露骨嘅感覺。作為一部百科全書，我唔認為應該畀人一種咁嘅感覺。

啱啱見到女人嘅外陰部叫做「閪」，我唔知呢個字不嬲係粗口定係後來先演變成粗口，無可否認今時今日大多數人都認為佢係粗口，用佢嚟指代嗰個身體部位的確不堪入目，唔知你又點睇呢？Professorjohnas (傾偈) 2012年7月10號 (二) 05:19 (UTC)[回覆]

「粵語」所謂「方言」，冇人記低啱寫法同讀法。久而久之就冇咗，今日好多嘅寫法好多淨係可以由講嘅嘢度搵翻。問題就來，因為唔同社會階層嘅人講嘅嘢唔同，受過教育嘅就覺得冇嘅講嘢粗鄙、「市井」、「核突」，又奇怪，呢啲冇乜受過「教育」嘅人，佢地講嘢好傳神、地道。好彩嘅，香港嘅教育重未有系統咁謀殺廣州話，不過我地真係多得自以為「有文化」、踩低自己嘅母語嘅人唔少。
講翻用粗口做題，正如我頭先咁講，唔應該用自己嘅感受去做選題嘅主要決定，即使係「確不堪入目」，係未搵到最地道廣東話之前，我會接受。至於「閪」做題其實有人唔同意，睇Talk:閪，你都可以講下你點睇（正字可能係屄）。不過，除咗「閪」講陰部之外，係有女陰嘅。「朘」已經係㞗／𨳊嘅改良版。 --WikiCantona (傾偈) 2012年7月11號 (三) 10:39 (UTC)[回覆]

我好欣賞你對廣東話嘅熱情，我都認同呢啲所謂「市井」嘅詞係應該保留嘅，畢竟佢哋係最「有廣東話味」嘅廣東話！(如果我踩低廣東話嘅話，我就唔會咁熱衷喺呢度貢獻啦！)問題係，要保留呢啲詞語係咪一定要透過將佢哋套用呢啲標題度呢？我有一個提議，不如「囉柚」、「朘」、「屎窟」等等標題用嚟講啲詞語本身而唔係佢哋所指嘅嘢(例如我哋可以搵下「囉柚」點解叫「囉柚」，講下佢嘅起源等等)，而「臀部」呢篇文就用嚟講返臀部本身，咁做「囉柚」呢個詞唔係保存得更加好咩？
至於「閪」呢個字，可能康熙字典嘅年代佢仲未係粗口啦，但係今日佢已經演變為粗口喇，所以都係唔適合用嚟做文章標題。Professorjohnas (傾偈) 2012年7月11號 (三) 16:21 (UTC)[回覆]

我講踩低自己母語嘅人嗰時，只係大圍咁講，冇話特別指邊個，當然亦唔係話閣下啦，如果引起誤會，就此致歉。亦喺度多謝閣下嘅貢獻同埋問題，大家一齊搞好個廣東話維基。
至於「閪」字做做題嘅嘢，我將你提出嘅吸咗去相關嘅討論，請繼續。--WikiCantona (傾偈) 2012年7月12號 (四) 08:27 (UTC)[回覆]

唔該晒你將我嘅提議搬去嗰度。但係，想問返你對我第一點提議點睇呢？Professorjohnas (傾偈) 2012年7月12號 (四) 12:45 (UTC)[回覆]

囉柚有乜咁核突？完全唔覺喎。何況日常根本無人會講臀部。囉柚經已係婉轉之字，囉柚來自碌柚，形容佢個款，又圓又大。碌字轉音，先變成囉柚。HenryLi (傾偈) 2012年7月13號 (五) 07:45 (UTC)[回覆]

喬硯農話，屎窟係屁股，碌柚又係屁股。以我之見，囉柚應就嗰兩舊肉，屎窟係條罅，而屎窟窿先係出屎處。HenryLi (傾偈) 2012年7月13號 (五) 07:50 (UTC)[回覆]