飛蛾（粵拼：fei1 ngo4；英文：moth），學名叫異角亞目（Heterocera），係鱗翅目嘅其中一個亞目，係蝴蝶嘅近親。同第啲昆蟲一樣，飛蛾屬節肢動物－佢哋身體嘅表面有一節節嘅外骨骼，成蟲嘅身體分做頭、胸同腹三橛；飛蛾冚唪唥都曉飛，兩對翼就生咗喺個胸嘅背脊度；同蝴蝶嘅翼一樣，飛蛾嘅翼上面有鱗，不過飛蛾色水通常冇蝴蝶嘅咁鮮艷。另一樣同蝴蝶唔同嘅係，多數物種嘅飛蛾都係興夜晚出沒嘅，不過都有部份物種係興朝頭早出沒嘅。
