Wikipedia:是日正文/2020年11月

出自維基百科,自由嘅百科全書
一條DNA分子;佢上面有數以億計嘅鹼基對,每對都可能對隻生物嘅特徵有影響。
一條DNA分子;佢上面有數以億計嘅鹼基對,每對都可能對隻生物嘅特徵有影響。

進化,又叫做演化或者天演,喺生物學上嚟到講,指嘅係一柞生物嘅可遺傳特徵一代一代噉演變嘅過程,而佢嘅操作定義(喺實際科研度用嘅定義)係「一個族群內部嘅基因頻率隨住時間而改變嘅過程」。

所有生物物種(包括人類)身上都有DNA,呢啲DNA係由基因組成嘅,而所有物種嘅內部都或多或少有啲個體差異-就算係同種嘅生物,隻隻身上帶嘅基因都同其他同類身上嘅有些少唔同。呢啲個體差異令到一個族群內部每一個個體嘅特徵都有些少唔同,而呢啲特徵可能會左右到一隻生物成功生存同繁殖機會率,佢哋當中可能有啲比較叻生存同埋繁殖,而生存同繁殖能力勁啲嘅個體會更加能夠將自己嘅基因傳俾下一代,而冇噉曉生存同繁殖嘅就做唔到呢樣嘢,所以一個族群嘅基因代代都會有些少唔同咗樣:例如係「跑步速度」呢個特徵,佢受到嘅長度同埋肌肉強度等嘅因素影響(而後者係受基因影響嘅),跑得快啲嘅個體冇噉易俾啲獅子老虎等嘅獵食者捉住,所以會比較叻生存落去同埋繁殖後代-呢啲個體能夠成功將佢哋嘅基因傳俾下一代嘅機會就會高啲,所以長期嚟講,呢個族群嘅跑步速度就會變到愈嚟愈快。除咗噉,喺繁殖嘅細胞分裂等嘅過程之中仲會有突變等嘅現象。於是乎,經過幾百萬年嘅時間,一個族群變變吓就會變到同之前完全唔同咗樣,而呢群新嘅生物嘅DNA帶嘅基因同之前嘅好唔同,差異可能大到唔曉同之前嗰個族群交配並且成功噉生產下一代,一個新嘅物種就噉成咗形。

對於進化嘅研究好有學術同實用價值。喺實際應用方面,科學對進化嘅了解經已俾人應用喺農業同埋醫學等嘅領域度(好似係了解細菌嘅進化對於啲醫學家整抗生素嚟講好緊要)。而且進化嘅相關概念喺人工智能嘅設計嗰度都有用。(成篇文章……)

以前嘅正文: 太空統計學地球