塔利班
| 塔利班 طالبان | |
|---|---|
 塔利班嘅旗，亦係阿富汗伊斯蘭酋長國嘅國旗 | |
| 領導人 | 穆罕默德·烏瑪 （1994年–2013年，建立者、精神領袖）[1] 阿赫塔爾·曼蘇爾 （2013年–2016年） 海巴圖拉·阿洪紮達 （2016年–） |
| 活躍時期 | 1994年–1996年（軍事組織） 1996年–2001年（首次掌權） 2004年–2021年（武裝遊擊隊） 2021年起（重新掌權） |
| 活躍地域 | 阿富汗、巴基斯坦開伯爾–普什圖省 |
| 意識形態 | |
| 總部 | |
塔利班（普什圖話：طالبان）係阿富汗一個伊斯蘭武裝組織。阿富汗伊斯蘭酋長國就係由佢哋建立，實施獨裁專制同政教合一。
塔利班以普什圖人為主，原本係一班經文學校嘅學生，但係阿富汗因為經歷抗蘇戰爭同反傀儡戰爭之後，成個阿富汗因為軍閥間混戰而搞到立立亂，周圍又殺人又強姦乜都齊，於是喺阿富汗境內，加埋巴基斯坦難民營入面一班經文學校嘅學生頂唔順，以穆罕默德·烏瑪教長（Mullah Mohammed Omar）為首嘅一班人，由最初只係清談時局嘅組織，決定用激進方式武裝起嚟，加入政治同軍事鬥爭，塔利班原本嘅目的係為咗剷除軍閥，恢復和平伊斯蘭社會，不過因為佢哋極端保守嘅宗教主張，執政期間搞到阿富汗經濟完全崩潰。後來群埋落賓拉登度，搞到阿富汗成為恐怖份子訓練中心。
名
[編輯]「塔利班」係普什圖話音譯。意譯係「學生」。普什圖原文係「學生」嘅複數形式。[11]
歷史背景
[編輯]1979年蘇聯為咗擴展勢力而入侵阿富汗，但英美兩國為咗唔想令蘇聯坐大，就介入咗阿富汗抗戰活動。另外，沙地阿拉伯同巴基斯坦亦基於共同對伊斯蘭信仰嘅情誼，亦出手相助。其中美國對阿富汗嘅反抗軍提供咗成五十憶美元嘅軍事援助，而一個喺沙地阿拉伯富家子弟出身嘅賓拉登（Osama bin Laden）亦負責喺阿拉伯招募志願軍加入阿富汗反抗軍行列，佢招募到嘅志願軍差唔多有成三萬五千人咁多，呢啲加入抗戰活動嘅志願軍又叫做「聖戰者」。由於各國嘅軍事支援，令阿富汗變成一個好大嘅軍火庫。
1989年蘇聯軍終於撤離阿富汗，但係嚟自各國嘅聖戰者同喺民間游擊隊嘅聖戰者之間又開始發生鬥爭，因為喺抗蘇期間而造成政治真空，所以唔同嘅軍閥之間個個都想做阿頭，而啲軍閥之間嘅鬥爭手段又好殘忍，殺人放火姦淫擄掠乜都有，結果，以歐瑪爾教長（Mullah Mohammed Omar）為首嘅一宗教學生就頂唔順，就由最初只係議論局勢，純粹吹水嘅組織，武裝起嚟以激進方式同啲軍閥死過。呢班宗教學生組織，亦即係「塔利班」，阿拉伯話同普什圖話嘅塔利班就即係解學生，所以亦有人譯做「神學士」。
塔利班喺1994年掘起，由於好多阿富汗人對啲軍閥嘅所作所為已經忍無可忍，好多塔利班殺軍閥鋤強扶弱嘅故事開始周圍傳，慢慢喺巴基斯坦同阿富汗難民營支持同加入塔利班嘅人就越來越多，塔利班游擊隊好快就成為對抗軍閥嘅力量，但喺呢啲戰爭入面，佢哋都好傷，例如歐瑪爾教長就盲咗一隻眼，坎達哈省長就無咗隻腳，重有好多領袖個個唔係盲就係跛。最後佢哋統一咗阿富汗南方普什圖人哋方，1996年攻入首都喀布爾，趕走北方聯盟，塔利班終於由游擊隊變成阿富汗執政政權。
理念
[編輯]
塔利班由宗教學生組成，自然以宗教信念為思想基礎，佢哋以「迪歐班德學派」（Deobandism）作為信仰根基，思想相當守舊同排他性好強，佢哋守舊到唔準有現代生活，睇電視、聽收音機都唔畀。傳統上婦女因為要有「體面」，所以要全身包到實晒。除此之外，由於傳統認為，婦女嘅責任係服侍丈夫同照顧仔女，所以唔畀婦女出街、唔畀返工、唔畀接受教育，結果喺塔利班政權下，好多婦女要喺街乞錢。另外，由於佢哋認為放紙鳶都唔係穆斯林行為所以禁止。喺2001年8月又下令禁止婦女進行任何娛樂活動，去旅行，出街買嘢都唔畀，違反嘅畀「宗教警察」發現，會立即鞭刑。同時又禁止上網。
佢哋又實施一啲傳統伊斯蘭教法式刑法，例如將違法嘅人用石頭掟死或者整斷手腳。
宗教背景
[編輯]抗蘇期間，有幾隊喺阿拉伯嚟嘅聖戰者脫離咗伊斯蘭黨，同喺阿富汗嘅一啲普什圖部族酋長成立咗一個「古籣經與聖訓宣教黨」，佢哋信奉巴基斯坦瓦哈比派之中一個叫賽來非耶嘅極端主義派系思想。呢班人排他性好強，佢哋會將唔肯參加抗蘇嘅人當做叛教者，然後執行傳統伊斯蘭教法式刑法處死，又唔肯接受非穆斯林嘅支援，同時又鍾意襲擊外國記者。後來呢班人成為塔利班嘅一部份，形成咗塔利班嘅極端保守思想。
受瓦哈比派影響而變得保守，加上喺打仗嗰陣，經文學院搵唔到一啲有毛拉資格嘅伊斯蘭教職人員入去教，搞到佢哋喺好多伊斯蘭同阿富汗歷史、伊斯蘭教法、古籣經智識都好貧乏，好多宗教智識都係靠自己估吓估下咁嚟，加上又同個世界脫晒節，唔好話一啲政治發展同經濟嘅理論，就算係好多現代伊斯蘭教法改革理論，佢哋直情連聽都未聽過。
後來佢哋喺巴基斯坦一啲伊斯蘭極端教派例如穆斯林兄弟會、伊斯蘭教士黨、巴基斯坦先知之友守護者（簡稱SSP）、伊斯蘭學者協會入面搵人入經文學院教，喺原本保守思想之下，再混合咗一啲巴基斯坦「迪歐班德學派」（Deobandism）思想，結果搞到重極端過呢啲極端派。
「迪歐班德學派」（Deobandism）係遜尼派哈乃斐學派入面，一個喺19世紀英屬印度興起嘅伊斯蘭復古主義分支，哈乃斐學派其實係伊斯蘭敎派入面最開明一個教派，而迪歐班迪教派本來亦係一個追求改革嘅教派，著重點樣令現代思想同伊斯蘭教法融合，不過喺巴基斯坦嘅迪歐班德學派都傾向保守，佢哋有啲主張，例如排斥什葉派、反對任何形式嘅階級觀念、重有對婦女約束等，去到原本已經保守嘅塔利班手上都變到好極端，極端到連原本傾向保守嘅迪歐班德學派人見到都嚇親。
因為咁樣，雖然塔利班以迪歐班德學派信仰為基礎，但係亦好反對迪歐班德學派一啲改革主張，例如塔利班認為辯論係一種邪說，唔可以接受任何懷疑。
塔利班反對伊斯蘭教一啲溫和派同西方社會妥協，亦拒絕同聯合國嘅人道機構妥協，甚至斥責嗰啲妥協嘅穆斯林領袖係腐敗。
大屠殺
[編輯]塔利班主要由普什圖族人組成，而普什圖族同哈薩拉族傳統上都係世仇，咁係由於哈薩拉人相傳係成吉思汗後人同突厥人、塔吉克人通婚嘅後代。而成吉思汗喺1222年因為報復佢一個孫仔喺巴米揚畀人殺死，於是將巴米揚地區所有人殺晒。之後哈薩拉族同普什圖族就成為世仇，兩族經常發生涉及大規模屠殺嘅報復活動。
不過由於哈薩拉族喺阿富汗無論政治、社會重有軍事上影響力向來都係較大。哈薩拉族以什葉派為主要信仰，而塔利班就以遜尼派為主，塔利班向來都覺得什葉派偽善，加上傳統流傳落嚟嘅種族仇恨，結果以普什圖族人為主嘅塔利班喺1998年7、8月期間佔領咗邁馬納（Maimana）之後，就開始咗一連串針對普什圖族人同什葉派嘅大屠殺。1998年8月8號塔利班車隊開入馬薩，之後開住架車一路瘋狂開鎗殺人，大人細路男人女人，連羊同騾仔都殺，一路殺殺咗兩日，殺到連唔係哈薩拉族都殺埋。之後有幾千個哈薩拉族人拉咗入監獄，又全部殺晒，一係就塞啲人入貨櫃屈死。
大屠殺死咗幾多人無一個確實數字，根據聯合國同紅十字會估計，至少都有成六千到八千平民被殺。
經濟影響
[編輯]販毒活動
[編輯]北方聯盟大戰
[編輯]國際關係
[編輯]伊朗
[編輯]1998年塔利班喺馬薩發動嘅滅族大屠殺，除咗係針對哈薩拉族，亦係針對什葉派教徒。於是，以多斯特（Mullah Dost Mohammed）為首嘅一批塔利班士兵，聯同巴基斯坦一個反什葉派組織「先知之友守護者」（Sipah-e-Sahaba Party，簡稱 SPP），就殺咗入馬薩嘅伊朗領事館，殺咗十一個伊朗外交官同情報員，重有一個記者，令伊朗對塔利班極為不滿，不過由於塔利班死口唔認，雖然係人都知十幾人已經死咗，但都只可以當失蹤處理，結果件事就一路拖咗好耐，重引起國際社會同聯合國關注。
塔利班又走去炸喺巴米揚啲佛像，令伊朗忍無可忍，於是伊朗政府根據聯合國憲章同國際法宣佈會對塔利班同成個地區發動自衛戰爭，而巴基斯坦因為同塔利班關係密切亦拖埋落水，亦令巴基斯坦同伊朗關係變差。
之後伊朗發動多次軍事演集，聯合國安理會見到就好緊張，搵人去咗同塔利班亞頭奧瑪爾傾，亦係塔利班第一次接觸聯合國官員。之後塔利班承認伊朗領事館十幾個人已經死咗，同時交出屍體，另外歐瑪爾釋放晒所有被佢哋捉咗嘅伊朗卡車司機，同時又承諾會聽聯合國話，又將指使殺人嘅多斯特收監，不過收監嘅原因唔係因為佢殺人，而係因為佢帶咗兩個哈薩拉族嘅女人做老婆。不過因為咁，伊朗同塔利班呢場仗雖然打唔成，但塔利班同國際社會牙印就開始越積越深，巴基斯坦亦因為咁而開始要同塔利班劃清界線。
聯合國
[編輯]聯合國因為要調停塔利班同哈薩拉族嘅種族仇恨而同塔利班開始關係，但無論哈薩拉族定塔利班都當聯合國無到。基本上塔利班唔知聯合國係乜，佢哋只係當聯合國嘅和平行動喺度搞笑同阻頭阻勢，亦覺得聯合國只係想喺阿富汗推廣西方價值觀，對聯合國嘅誤解令阿富汗好多人道救援工作做唔到。
1997年8月聯合國秘書長戈菲安南派咗阿爾及利亞外長布拉希米（Lakhdar Brahimi）去睇吓阿富汗乜環境，之後喺10月開咗個「相關國家組織」（Group of Concerned Contries）又叫做「六加二國集團」，成員包括巴基斯坦、伊朗、土庫曼、烏茲別克、塔吉克、中國、俄羅斯同美國，希望促成巴基斯坦同伊朗對話，同時落實對阿富汗武器禁運，以及阿富汗各派系之間對話。
戈菲安南希望促成巴基斯坦同伊朗對話，係因為呢兩個國家一直當聯合國無到，同時成日喺錢同物資方面都不斷供應畀阿富汗唔同派系，加劇阿富汗入面唔同種族同派系內戰。
賓拉登
[編輯]賓拉登因為支援阿富汗抗蘇戰爭而識到塔利班阿頭歐瑪爾，重做埋老友，喺塔利班佔領咗阿富汗首都成為阿富汗主要政權之後，重成為賓拉登同阿蓋達靠山，喺賓拉登發動幾次針對美國嘅恐怖襲擊之後，阿富汗成為賓拉登藏身之所，而塔利班亦一直保護賓拉登，即使國際社會不斷施壓要求交人，塔利班亦以賓拉登唔係塔利班嘅人，美國以致國際社會亦無証據話啲恐怖襲擊係賓拉登做，所以唔肯交人。同時賓拉登亦係塔利班作為交換國際社會承認塔利班喺阿富汗政權嘅籌碼。
但係喺2001年美國發生911事件之後，英美聯軍向阿富汗轟炸，令塔利班無咗阿富汗政權。但係早喺1999年2月塔利班已經將賓拉登偷偷送出咗坎大哈，之後賓拉登去咗邊都無人知，結果賓拉登變成咗塔利班嘅負擔。
巴基斯坦
[編輯]中華人民共和國
[編輯]2021年7月，阿富汗塔利班政治委員會負責人巴拉達爾同中國國務委員兼外長王毅喺天津會見，中方表示阿塔係阿富汗重要嘅軍事同政治力量，希望阿塔推動阿富汗嘅和平和解，自主建立符合阿富汗自身國情、廣泛包容嘅政治架構[12]。中方強調，希望阿富汗塔利班打擊東伊運等一切恐怖組織[12]。阿塔方面表示中國一直係阿富汗人民值得信賴嘅好朋友，讚賞中方係阿和平和解進程中嘅作用。阿塔對爭取同實現和平抱有充分誠意，願意各方一道，致力於係阿建立廣泛包容、被全體阿人民接受嘅政治架構，保障人權同婦女細路權益[12]。阿塔唔允許任何勢力利用阿富汗領土做危害中國嘅事情[12]。阿塔認為阿富汗應同鄰國以及國際社會發展友好關係[12]。阿塔將營造誼商環境，希望中方未來積極參與阿富汗和平重建同經濟發展[12]。
和談
[編輯]塔利班同阿富汗政府曾經多次進行秘密談判。
2015年7月7號，阿富汗政府同塔利班代表喺巴基斯坦首都伊斯蘭堡附近舉行和談，中美都派代表參加。呢個係阿富汗政府同塔利班之間嘅首次官方和談[13]。
美國總統當勞侵上台後談判進度加快，2019年6月，塔利班代表抵達中華人民共和國外交部會談[14]。
2019年8月3號，塔利班喺卡達嘅政治總部發言人夏亨表示將會同美國開始一場正式談判[15]。美國總統川普同日喺白宮同記者講：「我哋已經取得好大進展。我哋正在談」。
2019年9月初[16][17]，中東半島電視台消息話美塔達成一個11點原則嘅談判框架。美國總統侵亦原本喺9月8號同塔利班領導人進行秘密和談，但係因為塔利班稍早前喺喀布爾嘅襲擊導致美國軍人死亡，侵宣佈取消同塔利班領導人談判[18]。
2020年2月22號凌晨開始，美國、阿富汗政府同塔利班開始為期一周嘅「減暴」協議。「減暴」期間，塔利班將唔會對城市、公路、美軍基地同阿富汗安全部隊襲擊。阿富汗安全部隊同北約駐阿富汗聯軍亦唔會對塔利班展開軍事行動[19]。
多哈協議
[編輯]2020年2月29號，美國同阿富汗塔利班簽署協議，協議規定駐阿富汗美軍將會逐步撤軍，阿富汗塔利班就保證打擊恐怖組織基地組織、伊斯蘭國，並同喀布爾政府進行和平談判[20][21][22]。由於阿富汗總統拒絕釋放塔利班囚犯，塔利班同阿富汗政府再次爆發衝突。僅僅喺3月4號，塔利班又殺死至少20名阿富汗士兵同警察。塔利班喺阿富汗34個省當中嘅15個省發動30次襲擊，一共殺死咗35名阿富汗安全部隊士兵[23]。隨後塔利班遭到美軍空襲[24]。4月20日，塔利班又殺死至少23名阿富汗軍警及9名平民[25]。
2020年9月12號，阿富汗政府同塔利班喺卡塔爾進行談判[26]。但係阿富汗產生傷亡嘅暴力事件依舊持續。阿富汗政府希望雙方達成政治安排之前塔利班率先停火，但係塔利班拒絕接受[27]。
拜登就任美國總統後，宣佈美軍將會喺2021年5月1號開始撤軍，預定9月11號前美軍將會全部撤出阿富汗，多個北約國家亦表示將會喺阿富汗撤軍[28]。2021年7月2號，美軍將巴格拉姆空軍基地移交至阿富汗軍方接管[29]、白宮新聞秘書普薩基表示駐阿富汗美軍預計喺8月底前完全撤出[30]。由2021年5月開始，一方面美國等外國軍隊開始撤離阿富汗；另一方面，阿富汗塔利班就喺阿富汗全國各地發動若幹次重大攻勢擴張佢哋勢力版圖，對喀布爾現有政權能唔能夠持久存在遭受嚴峻考驗[29]。
炸大佛
[編輯]2001年2月16號，歐瑪爾下令銷毀所有阿富汗境內所有非伊斯蘭文物，歷史悠久嘅巴米揚大佛成為銷毀對象，雖然聯合國教科文組織同外國非政府組織不斷反對，但塔利班一於話之你，喺2001年3月，經過近一個月猛烈炮轟下，最後炸到個佛像爛晒。
美國介入，取締塔利班
[編輯]2001年美國發生911事件之後，矛頭直指向賓拉登，原因係早喺6月賓拉登已經發出警告將會對美國同以色列發動恐怖襲擊，所以喺2001年9月11號美國世貿大樓同華盛頓五角大樓受到襲擊之後，賓拉登自然成為頭號疑犯。由於賓拉登受到塔利班保護，經巴基斯坦出面要求塔利班交出賓拉登，但塔利班話無証無據所以唔肯交人。結果，美國國會同意總統布殊嘅反恐政策，即係話要以武力反擊恐怖主義。
9月15號塔利班趕走晒阿富汗境內所有外國人，同時揚言如果附近有邊個國家幫美國，實會報復。但係喺正阿富汗側根嘅巴基斯坦政府就決議支持美國反恐政策，立即關閉阿富汗邊境，同時開放領空畀美軍飛機飛過。最後喺10月7號，英美聯軍連續幾日空襲阿富汗[31]。最後喺12月7號，塔利班宣佈放棄抵抗，同時向普什圖族部落領導人組成嘅新政權繳械，塔利班喺阿富汗嘅第一政權正式結束[32]。
睇埋
[編輯]參考
[編輯]- ↑ "Pakistan: A Plethora of Problems" (PDF). Global Security Studies, Winter 2012, Volume 3, Issue 1, by Colin Price, School of Graduate and Continuing Studies in Diplomacy. Norwich University, Northfield, VT. 喺2012-12-22搵到.
- ↑ 2.0 2.1 http://www.digitaljournal.com/article/347009 互聯網檔案館嘅歸檔，歸檔日期2019年11月29號，. "To rule Afghanistan and impose the groups interpretation of Islamic law which includes influences of Deobandi fundamentalism and Pashtunwali culture"
- ↑ Deobandi Islam: The Religion of the Taliban U. S. Navy Chaplain Corps, 15 October 2001
- ↑ Maley, William (2001). Fundamentalism Reborn? Afghanistan and the Taliban. C Hurst & Co. p. 14. ISBN 978-1-85065-360-8.
- ↑ http://www.oxfordislamicstudies.com/print/opr/t236/e0895"The 互聯網檔案館嘅歸檔，歸檔日期2019年5月31號，. Taliban's primary religious and ideological influence is a form of Deobandī Islam."
- ↑ Rashid, Taliban (2000)
- ↑ "Why are Customary Pashtun Laws and Ethics Causes for Concern? | Center for Strategic and International Studies". Csis.org. 2010-10-19. 原著喺2014-10-21歸檔. 喺2014-08-18搵到.
- ↑ "Understanding taliban through the prism of Pashtunwali code". CF2R. 2013-11-30. 原著喺2014-08-10歸檔. 喺2014-08-18搵到.
- ↑ "Afghan Taliban". National Counterterrorism Center. 原先內容歸檔喺2015-05-09. 喺2021-08-16搵到.
- ↑ "ISIS active in south Afghanistan, officials confirm for first time". 2015-01-12. 原先內容歸檔喺2015-11-11. 喺2021-08-16搵到.
- ↑ "TALIBAN | Definition of TALIBAN by Oxford Dictionary on Lexico.com also meaning of TALIBAN". Lexico Dictionaries | English (英文). 原著喺2021-08-16歸檔. 喺2021-08-24搵到.
- ↑ 12.0 12.1 12.2 12.3 12.4 12.5 〈王毅會見阿富汗塔利班政治委員會負責人巴拉達爾〉 (中文)。中華人民共和國外交部。2021-07-28。原先內容歸檔喺2021-07-28。喺2021-08-13搵到。
- ↑ 〈存檔副本〉。原著喺2015-07-13歸檔。喺2015-07-13搵到。
- ↑ 〈新浪-塔利班首席談判代表訪華〉。原著喺2021年3月1號歸檔。喺2021年8月14號搵到。
- ↑ 美塔談判
- ↑ 央視官方頻道-消息稱美國與塔利班商定衝突調解
- ↑ 阿富汗談判啟動
- ↑ 特朗普取消與塔利班的和談
- ↑ 〈喀布爾：與塔利班的「減暴」協議將於凌晨開始〉。
- ↑ 〈美國和塔利班簽署歷史性協議〉 (中國中文)。德國之聲。2020-02-29。原先內容歸檔喺2021-08-01。喺2021-08-01搵到。
- ↑ 〈美國與神學士簽協議 14個月後美軍全數撤出阿富汗〉。原著喺2020年10月29號歸檔。喺2021年8月14號搵到。
- ↑ 美國和塔利班簽署歷史性協議
- ↑ 美軍和塔利班又動手了
- ↑ 外媒：美軍發言人稱美國對塔利班武裝分子展開空襲
- ↑ 停戰協議如廢紙 不顧疫情塔利班暴力開殺戒
- ↑ 〈阿富汗政府與塔利班談判將於9月12日開啟〉。
- ↑ 〈阿富汗卡車炸彈攻擊炸死15人〉。
- ↑ 〈阿富汗國防部說美軍撤離駐阿最大軍事基地〉 (中文)。新華網。2021-07-02。原先內容歸檔喺2021-08-01。喺2021-08-01搵到。
- ↑ 29.0 29.1 引用錯誤 無效嘅
<ref>標籤；無文字提供畀叫做:0嘅參照 - ↑ 〈美國白宮表示駐阿富汗美軍預計於8月底前完成撤軍〉 (中文)。新華網。2021-07-03。原先內容歸檔喺2021-08-01。喺2021-08-01搵到。
- ↑ 美軍連續第三晚空襲阿富汗，2001年10月10號BBC新聞
- ↑ 美實施報復行動[失咗效嘅鏈]，CCTV專題報導