婆羅米系文字

2012 年尼泊爾加德滿都一塊路牌，個牌用天城字同羅馬字寫咗同一個地名；尼泊爾話傳統上用天城字（一種婆羅米系文字）寫。

2023 年响泰國影到嘅一塊牌；泰國話有齊晒羅馬化方案，但慣例上用開泰文字寫，而泰文字係一種婆羅米系文字。

婆羅米系文字（英文：Brahmic script）或者印度系文字（英文：Indic script），係印度孔雀王朝嘅婆羅米字派生而嚟嘅一種文字體系，屬於音素音節文字（Abugida）。佢廣泛用喺南亞、東南亞、部分中亞同東亞地區。

起源

内文：婆羅米字

婆羅米系文字係指一系列由婆羅米字演化出嚟嘅文字系統。婆羅米字係一種好古老嘅文字，喺公元前 3 世紀嗰時經已存在，當時著名嘅古印度皇帝無憂王已經有喺度用婆羅米字嚟寫嘢，後嚟印度教等嘅古印度思想周圍廣傳，婆羅米字就自然跟住一齊傳到去成個印度半島，甚至遠至東南亞嘅都有，亦出現咗多種唔同嘅變體。

婆羅米字係一套 abugida 型嘅文字，而由佢衍生出嚟嘅文字系統都傾向係 abugida 型嘅。

睇

• Abugida