對稱密匙密碼

對稱密匙密碼嘅圖解；家陣有兩個人（Bob 同 Alice）之間通訊，明文係 Hello Alice!，加密同解密都係用同一條「鎖匙」嚟做。

對稱密匙密碼（symmetric-key cryptography）泛指傳訊人同收訊人用嘅密匙一樣嘅密碼體制。密匙係指用嚟幫手做加密同解密嘅額外資訊，例如圍欄密碼法同凱撒密碼法當中嘅 $n$ 以及係彼利菲密碼法同維吉尼密碼法當中用到嗰啲關鍵字。喺實際應用上，用家梗要有啲方法傳達有關「密匙係乜」嘅資訊，收訊人先會有能力做解密，通常係傳訊人同收訊人事先講好個用開嘅密匙，或者係傳訊人要傳信息之前講個密匙俾收訊人知。一路直至 1976 年中為止，世上嘅加密方法冚唪唥都係用對稱密匙密碼做嘅。