義和拳
(由義和團跳轉過嚟)
 |
 |
義和拳，又叫做義和團，係中國19世紀末一個反西方嘅組織。佢哋認為自己練嘅拳係刀槍不入，唔怕洋鎗大炮。呢個組織1900年（庚子年）響山東搞咗場好大型嘅暴力排外社會運動，史稱義和團運動，呢場運動又叫做義和拳匪亂、庚子事變、庚子拳亂。
個組織係針對響中國嘅外國人，成員見到人就亂打亂殺，見到有關嘅嘢唔係燒就係拆，連同西方有關嘅華人都一樣遭秧。後尾引起西方世界反彈，招致八國聯軍圍攻，搞到首都北京城被攻佔，要賠款，影響深遠。
歐美同埋日本等列強，之後嘅大清政府，或者中華民國政府，都認為呢場係暴亂，參與嘅人都係愚昧無知。
截至1900年8月，總共有超過240名外國人、2萬幾名中國基督徒，以及數都數唔晒嘅義和團拳民，佢哋支持者，以及其他人喺呢場運動及之後嘅鎮壓中死亡。
發展
[編輯]源頭
[編輯]關於義和團源頭，史學界有爭議。義和拳嘅成員畀人叫做「拳民」或者「拳匪」。義和拳原本係長期流行響山東、直隸（今河北）一帶嘅民間秘密會社。義和拳利用設立神壇、畫符請神等嘅方法秘密聚眾，教授信眾修煉一種據稱可以令人刀槍不入嘅拳法，即係「義和拳」。義和拳其實同神打差唔多，都係起壇作法，令人迷迷糊糊，念咒語然後請神仙上身，然後自以為刀槍不入。呢庭法術係中國民間，特別係無受教育嘅一個階層一向都有流行。好似太平天國嗰班「王」最初作反一樣成日請神上身，不過太平天國請上身嘅係上帝、耶穌；而義和團就請埋齊天大聖、關雲長等等小說人物。最初義和拳反對滿族統治，以「反清復明」為口號。後來轉而支持大清而極力排外，口號改為「扶清滅洋」（1898年由趙三多首次提出）。