英國上議院

英國上議院議事廳

英國上議院（House of Lords of the United Kingdom），又叫貴族院（House of Peers），係英國國會嘅上議院，喺倫敦西敏宮開會。英國上議院嘅正式全名叫「大不列顛及北愛爾蘭國會尊敬嘅靈職及世俗貴族集合」（The Right Honourable the Lords Spiritual and Temporal of the United Kingdom of Great Britain and Northern Ireland in Parliament assembled）。

上議院嘅議員全部都唔係民選嘅。議員包括靈職議員同埋世俗議員。靈職議員代表國教英倫聖公會，由時任主教兼任。由於聖公會係英國國教，靈職議員同其他上議員有相同立法權力，但英國聖公會本身嘅憲制修訂亦需要靈職議員喺上議院提出，國會通過，先至算數。

世俗議員就分兩類，一類係世襲貴族，佔92席，每有空缺就由淨返嘅世襲貴族議員選一個貴族嚟填補；另一類係終身貴族，由君主按首相提議委任，人數冇上限。上議院議員可以兼任政府官員。

上議院開會時，議員分三邊坐。執政黨同靈職議員坐一邊；反對黨坐對面；中立議員就坐側邊打橫擺嘅凳，所以又叫橫凳議員(Crossbencher)。

英國國會嘅法例草案可以由政府喺英國下議院提出，亦可以由下議院或者上議院主動提出。法案要過晒兩院先至會成為法律。上議院負責審核英國下議院通過嘅法案，而且經常會提出修訂。一般情況下，上議院無權單方面廢除下議院通過嘅法案，但可以將具爭議嘅法案發還下議員重審，或者拖延法案生效日期最多一年，為英國嘅民主政制提供選票以外嘅一種權力制衡。上議院有自己獨立於下議院嘅支援設施，例如上議院圖書館。

每年國會開幕大典，君主都會喺上議院議事廳向全體國會議員致辭，內容一般由現屆政府提供，解釋嚟緊一年嘅立法計劃。終審法庭嘅崗位曾經由上議院轄下嘅上院法官包辦，直至2009年英國終審法院成立，立法、司法正式徹底分家。