英國航空

英國航空
IATA BA ICAO BAW 呼號 SPEEDBIRD
創立	1919年
開始營運	1974年4月1號
營運基地	倫敦
樞紐機場	倫敦希斯路機場, 格域機場
航空聯盟	寰宇一家
子公司	開放天空, dba[*], BA Connect[*], Go Fly[*], Air Liberté[*], L'Avion[*], British Airways Limited[*], Caledonian Airways[*], CityFlyer Express[*], BA CityFlyer[*], BA EuroFlyer[*]
母公司	國際航空集團
官方網站	https://britishairways.com/
[改維基數據]

英航總部位於倫敦嘅Waterside大樓

A319喺倫敦希斯路機場起飛

A321從曼徹斯特起飛

英國航空（英文：British Airways，LSE：BAY，又稱大英航空、不列顛航空，簡稱英航）呼號為'speedbird'，係英國嘅國家航空公司，亦係英國歷史上最悠久嘅航空公司，寰宇一家嘅創始會員之一，亦係國際航空集團旗下公司。主要樞紐係倫敦希斯路機場及倫敦吉域機場。

英國航空係全球最大嘅國際航空客運公司，全球第七大嘅貨運航空公司，歐洲第二大航空公司，西歐最大嘅航空公司之一，全球兩間曾經擁有和諧式客機嘅航空公司之一，另一間曾經擁有和諧式客機嘅航空公司係法國航空。英航曾經喺倫敦證券交易所上市，2011年營業額係108億2千7百萬英鎊。

歷史

1924年，英國航空嘅前身：帝國航空成立，負責營運英國以東嘅航線，由當時英國四個航空界龍頭合併組成，其後亦設立唔少分公司，包括英國海外航空同埋英國歐洲航空等。1974年，英國海外航空同英國歐洲航空合併，組成英國航空，機隊由BAC 1-11、波音707、波音747、三叉戟、維克斯VC10、維克斯子爵式、維克斯前鋒同L-1011組成。

1976年，英國航空引進咗當時世界上最快嘅民航客機：和諧式客機，1977年引進咗波音747-200。到咗1984年，維珍航空成立，好快成為英國航空嘅競爭對手。

1993年，因應中華民國外交特殊環境而經營倫敦－香港（啟德機場、赤鱲角機場）──台北嘅英亞航空成立；最後喺2001年終止營運，並將該班次航權移交畀國泰航空。目前台灣方面剩返長榮航空飛航台北－曼谷－倫敦嘅航線；中華航空曾經喺2010-2012年間通航嘅台北－倫敦航線則移交畀荷蘭航空並改為台北－阿姆斯特丹－倫敦。

2006年，英國航空獲Skytrax選為年度全球最佳航空公司。

2008年，英國航空大部份航班遷入專為英航而設嘅倫敦希斯路機場嘅五號客運大樓，耗資43億英鎊，佔地約250公頃，位於跑道27L/09R及27R/09L之間，由英女王伊利沙伯二世喺2008年3月14日開幕並喺同年3月27日開放畀乘客使用，第一班使用該客運大樓係喺早上4時50分從香港抵達嘅BA026號班機。現時，唔係所有英航航班都係用五號客運大樓，例如去曼谷、新加坡同悉尼嘅航班係用四號客運大樓。

2010年4月8日，英國航空同西班牙國家航空正式簽署合併協議，將結成全球營收第3大嘅航空公司。

兩間航空公司將會喺新控股公司國際航空集團（International Airlines Group，IAG）框架下聯營，合併年營收約200億美元，將以408架機隊規模飛行全球200條航線，每年載客量超過5800萬人次。

IAG合併市值約80億美元，將會喺英國、西班牙兩地交易所掛牌。英航股東將以1:1比率交換IAG新股，掌握55%股權，伊比利亞股東就以1股換1.0205股，掌握剩餘45%。兩間公司將由一間控股公司持有，但維持獨立結構及品牌，以免危害落地權。

出面網頁

• 英國航空官方網站