馬頭涌

  提示：呢篇文講嘅唔係馬坑涌。

聖山前嘅馬頭涌，左側係馬頭涌村

馬頭涌（Ma Tau Chung）係香港一地，亦係一涌同一村。佢喺九龍城以南，馬頭圍以東，馬頭角以北。東面對住啟德同宋王臺。未有大興土木之前，馬頭涌係一涌，由東面馬頭圍後山，越田經馬頭涌村，過聖山流入九龍灣。而村係背靠聖山，山後同九龍城之間有珓杯石同衙前塱兩村。日治時期，日軍炸聖山填海，擴大啟德機場，馬頭涌自始與啟德毗類，遠離九龍灣洋面。而村亦因開拓而拆咗，涌亦不復見。今日宋皇臺公園以東一帶，就係馬頭涌原地。

馬頭涌大街有馬頭涌道、宋皇台道、亞皆老街同太子道。因爲馬頭涌、馬頭圍、馬頭角原本係村，開拓市區就連成一片，並無明顯疆界，所以命名時往往交錯其中。而馬頭涌，大約指原本聖山或者啟德機場以西嘅地方。

馬頭涌有公共屋邨名真善美村，由香港房屋協會打理。另有馬頭圍邨，由香港房屋委員會打理。

史

北京條約中寫咗馬頭涌。不過位置有錯。馬頭涌字個位係馬頭角，而馬頭涌喺北一啲，邊界同海角交界處。

大宋之末，趙昰、趙昺二帝，南逃之至官富場。後人念其到臨，稱石山爲宋王台。帝昰母楊太后，卽宋度宗嘅楊淑妃，愛女晉國公主都有同行，後尾墮海溺斃，失屍身，於是鑄金身，葬於宋王台另一石山中，人稱金夫人墓。

一八九零年，顧啓德同老婆立聖三一堂，屬聖公會，以家庭式傳敎。一九零五年，鄺日修牧師喺宋王臺山腳立敎堂。一九零五年，要起宋王臺公園，搬到聖山北面山仔，域多利孤兒院側邊。原本係金夫人墓，墓因而毁。一九三六年，因啟德基場工程，又搬到馬頭涌道一百卅五號。

馬頭涌喺日治時期，有馬頭涌戰俘營，初頭叫馬頭圍，一九三八年起來做難民營，亦收中國軍隊。日佔後主要困住印度兵。當時地方惡劣，死者就喺附近亞皆老街軍營花園埋葬。

約一九二零年，馬頭涌側邊嘅聖山，上有宋王臺

屋宇

以馬頭涌命名屋宇機關

• 馬頭涌官立小學
• 馬頭涌消防局
• 馬頭涌救護站
• 家庭計劃指導會馬頭涌診所
• 馬頭涌官立小學（紅磡灣），喺紅磡。
• 馬頭涌煤氣鼓，喺馬頭角。

地內屋宇機關

• 聖公會聖三一堂
• 真善美村
• 馬頭圍邨