中華民族偉大復興

中華民族偉大復興係中國共產黨喺1997年召開嘅中共十五大提出嘅執政理念，取代之前嘅「振興中華」理念。2002年中共十六大，胡錦濤做咗中共總書記之後對呢個理念加以發展。到咗2012年中共十八大，習近平接任中共總書記之後，進一步強化呢個理念，又喺呢個基礎上提出「中國夢」嘅構想。

正面評價

目前對中華民族偉大復興嘅正面評價主要嚟自中國官方傳媒。根據《人民日報》評論文章，中國人民抗日戰爭嘅偉大勝利，係中華民族從近代以嚟陷入危機，走向偉大復興嘅歷史轉折點。抗日戰爭之所以能取得偉大勝利，係因為以愛國主義為核心嘅民族精神得到繼承同弘揚；係因為中國共產黨發揮咗中流砥柱嘅作用；係因為已經覺醒咗嘅中國人民同中華民族進行咗全民族抗戰；係因為愛好和平同正義嘅各國人民嘅幫助支持起咗一定嘅作用。

習近平總書記喺紀念中國人民抗日戰爭暨世界反法西斯戰爭勝利75周年座談會上嘅重要講話，回顧咗中國人民抗日戰爭同世界反法西斯戰爭嘅歷史，深刻總結咗中國人民贏得抗日戰爭勝利嘅歷史啟迪。深入學習領會習近平總書記重要講話精神，深刻認識抗日戰爭勝利嘅歷史原因，深刻理解抗日戰爭勝利嘅偉大意義，大力弘揚偉大抗戰精神，對於我哋增強「四個意識」、堅定「四個自信」、做到「兩個維護」，奮力走好新時代嘅長征路，實現「兩個一百年」奮鬥目標、實現中華民族偉大復興嘅中國夢，具有十分重要嘅意義。

負面評價

睇埋：赤納粹

有分析將習近平嘅中華民族偉大復興同納粹德國領袖希特拉「一個民族，一個帝國，一個元首」嘅口號作比較，發現希特拉嘅德意志帝國同習近平嘅中國共產黨都以民族驕傲同經濟發展為誘因，意圖抹殺鄰近相同民族小國嘅主權、自由同民主，而希特拉同習近平同樣係以民族恥辱為由，宣揚德意志同中華民族嘅復興，引申「赤納粹」嘅論述。有分析亦指習近平所提倡嘅中華民族偉大復興夢推動民族主義，令中國人更有自信，同時借此強化中國人民對中國共產黨嘅信心，令中國好似二戰前納粹德國嘅第三帝國，呢樣引起全球多個國家，包括西方同中國週邊國家或者地區，例如日本、台灣同東盟國家莫大關注。

另外，為提倡中華民族偉大復興夢，並鞏固中國共產黨復興中華民族嘅領導地位，喺近年中國官方亦對中共前領袖毛澤東嘅評價進一步提升，指毛澤東為實現中華民族偉大復興作出咗彪炳史冊嘅貢獻，刻意淡化毛澤東喺管治中國嗰陣犯下嘅多個重大缺失，包括推行個人崇拜、發動或者主導咗土地改革、鎮反、三反五反、肅清暗藏嘅反革命分子、反右、大躍進、人民公社、四清、文化大革命等一系列政治運動。但係，近年中國為復興中華民族提倡多個策略，包括一帶一路，積極參與國際事務，加上2020年處理武漢肺炎嘅手法各項缺失，令疫情全球蔓延等，反而令到中國人喺國際間嘅名聲每況愈下。

根據美國權威民調機構「普優研究中心（又叫皮尤研究中心，英文名係Pew Research Center）」喺2020年10月公布嘅最新民意調查顯示，2020年世界各國對中國持負面觀感嘅比率分別為：德國71％、美國73％、荷蘭73％、瑞典85％、加拿大73％、西班牙63％、法國70％、意大利62％、韓國75％、日本86％。英國、澳洲對中國嘅負面觀感急劇升高，2018年英國49％受訪者對中國有好感，35％表示討厭中國；2020年最新調查顯示，而家有74％英國受訪國民對中國有負面觀感，呢樣令唔少人質疑習近平似乎未能夠帶領中華民族走向偉大復興，反而將中華民族嘅名聲帶至彷如清末所謂百年國恥（即係中國從十九世紀中葉到二十世紀中葉呢段歷史時期）嘅歷史新低，近期亦連累其他亞裔民族受到歧視，令中國人喺亞洲區內嘅名聲進一步轉差。