依附理論

呢幅相影到一個阿媽抱住佢個 BB：嬰兒期可以算係人生最脆弱嘅階段，咩都要靠周圍嘅大人照顧。

依附理論（粵拼：ji1 fu6 lei5 leon6 ），又或者叫愛着理論，係一套有關發育嘅理論，最基本係講照顧者同細路之間嘅互動，尤其係講照顧者會點樣對細路嘅情感需要（對安全感嘅需要）畀反應，而照顧者嘅呢啲反應，會影響個細路對佢產生乜嘢類型嘅情感依附。

依附類型

呢幅相影到一個女人帶住一個細路。

人類喺生命早期冇咩自理能力，要係噉同自己嘅照顧者互動，當中照顧者通常係阿爸同阿媽，但係亦都可以包括埋（例如）會幫手湊孫嘅阿爺阿嫲，或者係喺父母唔得閒嗰陣幫手照顧個細路嘅保姆。喺呢一段時期，照顧者嘅行為會深遠噉影響個細路嘅情感依附，當中特別重要嘅係照顧者有冇反應同埋有幾易預測。

畫做圖嘅話，可以想像以下噉嘅模型：

逃避型依附

如果照顧者成日都忽略個細路嘅情感需要（冇咩反應），個細路傾向會形成逃避型依附，噉嘅細路無論照顧者離開定係返嚟都唔會有咩情緒反應，彷彿好似佢哋根本唔在意照顧者係咪存在噉。

焦慮型依附

如果照顧者會理個細路嘅情感需要但難預測（例如有時會無啦啦冇晒反應），個細路傾向會形成焦慮型依附，呢種細路傾向一見到照顧者離開就出現強烈嘅負面反應，會大聲嗌大聲喊，而且對生保人以及其他未知嘅事物非常抗拒。好似成日都驚住照顧者會無啦啦唔見咗。

安全型依附

會理個細路嘅情感需要，兼且反應恆常嘅照顧者，就傾向會產生出具有安全型依附嘅細路，呢啲細路肯同生保人接觸（尤其係如果照顧者就响左近）。照顧者離開嗰陣，呢啲細路會或多或少有負面反應，而佢哋見到照顧者返嚟自己身邊嗰時會有正面反應。

大人時期

細路喺情感依附上嘅差異，對成年人行為影響深遠，無論係人際關係定係日常決策，都有好大作用。擁有安全型依附嘅人通常能夠建立健康嘅關係，佢哋信任他人，表達能力強。而焦慮型依附嘅人就唔同，佢哋可能會表現得好依賴，對被拋棄特別敏感，經常擔心伴侶唔愛自己。至於回避型依附嘅人，佢哋面對情感需求時，可能會選擇逃避，唔想同人親密。

此外，情感依附仲會影響成年人做決策嘅方式。對某些人嚟講，為咗迎合所愛之人的需要，佢哋甚至會犧牲自己嘅願望，成為「好人」。喺工作上，情感依附都會影響團隊合作，因為人哋嘅忠誠或者抗拒，往往都基於情感嘅聯繫。

動物研究

呢隻用奶樽餵大嘅駝鹿 BB 似乎對照顧佢嘅人產生咗感情。

睇埋：社會性

動物行為學研究顯示，好多物種嘅非人動物都有類似情感依附嘅現象，特別係有社會性嘅動物。啲細路會對阿媽（或者其他照顧者）產生情感依附。

大笨象係有感情嘅動物，佢哋對家庭成員非常忠誠，甚至會為已故嘅同伴感到悲傷，喺遺體附近守護，表現出哀悼之情。

狗唔單止對主人表現出忠誠，仲會好敏銳噉感受到主人嘅情緒，經常主動去安慰主人。

研究發現，某啲魚類都會有情感聯繫（或者類似嘅嘢），例如會同伴侶一齊游泳，互相護衛。

睇埋

• 信賴
• 兒童心理學

引咗

篇文用咗嘅行話詞彙，英文版如下：

篇文引述咗嘅學術文獻同埋網頁：