保安群組、裝修群組
 | 維基百科嘅醫學類文章只係提供參考，並唔係醫療意見。 閣下如果有任何關於健康嘅問題，請諮詢專業醫護人員。 |
除非特別寫明，否則本文所有時間都係以UTC+8時間為準。
| 疾病 | 武漢肺炎 |
|---|---|
| 病毒株 | 沙士病毒2型Delta變種 |
| 地點 |  澳門氹仔島金皇冠中國大酒店 |
| 頭單 | 2021年9月24號 |
| 資料匯總 | |
| 確診個案 | 13（截至10月19號） |
| 網站 | 抗疫專頁 |
 醫學聲明 | |
「保安群組」，或者叫「醫觀酒店保安群組」、「隔離酒店保安群組」[1] 、「酒店保安群組」，係指喺2021年9月下旬到10月下旬武漢肺炎澳門疫情入面，6個保安喺用作隔離酒店用途嘅金皇冠中國大酒店俾一名從外國返嚟澳門、入住嗰間酒店隔離嘅土耳其籍澳門居民 (第64例) 傳染，經過病毒基因排序後證實呢個群組感染咗Delta變種病毒株。
「裝修群組」，或者叫「裝修工人群組」，[2] 因為兩個群組曾經有兩個患者（第66例同第74例）一齊搭過同一部澳門25號巴士嘅車並且摸過同一條扶手而受到交叉感染，至今裝修群組總共有6個人染咗武漢肺炎，經過病毒基因排序證實同「保安群組」相同。此外，「裝修群組」揭發咗兩個越南籍外地僱員第74例同第75例確診患者係黑工。[3]
呢次疫情導致澳門特區政府系9月下旬、10月上旬同10月下旬，開展咗兩次全民核酸檢測計劃、一次重點區域核酸檢測計劃，對裝修、洗衣、保安工種嘅所有員工、尼泊爾籍同越南籍嘅外勞進行重點人群開展高頻次核酸檢測計劃；並開展咗分區防控精準方案，對多個確診者居住地方進行圍封，包括澳門半島沙梨頭麻子街、內港十月初五日街附近、高士德皇宮大廈同金多利花園、祐漢祐漢新村順利樓、黑沙環新美安大廈第一期、錦興大廈同御景灣或周邊嘅住宅大廈，以及路環平民村全村做咗紅碼區或者黃碼區。民防行動中心由9月25號凌晨12點鐘開始到10月15日中午12點鐘，宣佈全澳門進入「即時預防狀態」。[4][5]截至11月17日，兩個群組全部人好返，呢次疫情總共有13人確診。
經歷
[編輯]保安群組
[編輯]9月24號凌晨，新增第64例確診個案，係呢次疫情兩個群組嘅感染源頭，患者係31歲男性，土耳其籍澳門居民。患者由土耳其出發經新加坡轉機，佢喺9月18號入境澳門，入境時病毒檢測係陰性，抗體檢測結果符合疫苗接種後表現。入境後送去金皇冠中國大酒店隔離醫學觀察。23號夜晚病毒檢測驗出陽性，CT值顯示病毒量大，提示為新近感染[6]。同日夜晚，新增第65例確診個案，患者係27歲尼泊爾籍男性，任職金皇冠中國大酒店保安，喺第64例確診個案後隨即要求呢間酒店嘅保安、清潔同相關人員進行核酸檢測，結果兩名保安喺病毒檢測呈陽性，被當局列為輸入關聯個案[7]。由於呢三宗案例，澳門特區政府隨即宣佈自9月25號零時起，進入即時預防狀態，同日開始全民檢測[8]。
9月28號，作為醫學觀察酒店用途嘅金皇冠中國大酒店再多三名保安人員確診，為澳門第68例至第70例確診個案[9]。同日夜晚，酒店保安群組再新增一例確診。第71例確診患者係38歲男性，喺金寶來酒店任職外判保安。患者喺2021年4月24號同6月14號已經喺中國大陸接種一劑國藥滅活疫苗同一劑科興滅活疫苗。患者因同第65、66例患者已經被列為共同軌跡人士，所以喺9月25號開始已經喺酒店進行隔離醫學觀察，獨自一人喺房，唔使做嘢同無接觸其他工作人員。佢喺9月22同24號嘅核酸檢測顯示結果係陰性，28號經核酸檢測顯示結果為陽性而確診。患者無任何不適症狀，已經安排到公共衛生臨床中心進一步診治[10]。
裝修群組
[編輯]10月4號，澳門ー共新增3宗個案。第72宗確診個案患者係46歲男性，佢係裝修工人，住喺珠海斗門，曾經租住澳門英皇酒店、金沙酒店同維多利亞酒店，9月28號同30號核酸檢測顯示結果係陰性，喺10月4號經核酸檢測顯示結果係陽性而確診。患者喺2021年4月17號同6月10號已經喺澳門接種兩劑國藥疫苗。應變協調中心表示，患者無任何不適症狀，已經安排到公共衛生臨床中心進一步診治。原定喺10月4號澳門同珠海之間嘅關口從新開放亦要煞停[11]，同日開始再一次全民檢測，同上一次只係隔一個禮拜。之後，喺同日夜晚再多一人確診武漢肺炎，患者係52歲男士，中國大陸僱員，係第72宗個案46歲裝修工人嘅同事。呢排兩名患者有一齊工作，第73宗個案患者住喺澳門祐漢新邨順利樓。9月26號同30號核酸檢測結果係陰性，患者喺2021年分別喺7月3號同8月3號已經喺澳門接種兩劑國藥疫苗[12]。之後，再喺同日夜晚新增多一宗個案，第74宗個案係一位40歲越南藉工人，曾經同第72宗同第73宗裝修工人一齊做嘢。佢喺9月25號核酸檢測結果為陰性。患者喺2021年9月15號喺澳門接種一劑國藥疫苗，已經安排到路環高頂臨床中心診治[13]。
10月5號，再新增一宗個案，患者係一位42歲越南籍女僱員，係10月4號兩名確診中國大陸藉裝修工人嘅密切接觸者，佢喺10月5號經核酸檢測顯示結果呈陽性而確診。佢已經完成接種兩劑國藥疫苗，無任何不適症狀。另外，澳門行政公職局向公共部門發出指引，為減少疾病擴散嘅風險，免除公共行政工作人員喺今日開始至星期四期間返工，但係同時指出，公共部門嘅領導應該採取適當措施，確保因本身嘅性質而應經常對公眾提供服務嘅正常運作[14]。
之後，協調中心經調查發現喺10月5號記者會入面，第66例嘅隔離酒店保安員同第74例裝修工人喺9月24號曾經乘坐同一班次巴士，兩人喺車廂入面共處14分鐘，由於佢哋企嘅位置接近，又曾經揸過同一扶手，唔排除佢哋受到感染，所以認為「裝修群組」同「保安群組」病毒基因係同一個病毒來源[15]。
應變協調中心喺10月8號深夜發出公佈，澳門新增兩宗確診。當中，第76宗係中國藉外僱員工53歲男士，裝修工人，同第75例患者住喺同一單位；佢喺9月27號、10月5、6同7號嘅核酸檢測結果都係陰性，由於被列為第75宗嘅密切接觸者，所以喺10月4號接受隔離觀察，佢曾經喺5月31號喺澳門接種一劑國藥疫苗[16]。
第77宗係49歲女性，一名越南籍外僱家務助理，係第75宗患者朋友；患者喺9月25號、10月4、5、6同7號嘅核酸檢測結果係陰性，由於被列為第75宗個案嘅密切接觸者，已經喺10月5號接受隔離觀察，10月8號經核酸檢測陽性而確診。患者喺7月1同30號接種咗兩劑國藥疫苗。由於第77宗個案嗰位家務助理住喺御景灣第三座，所以御景灣所有居民即時實施只進不出措施，衛生局將會喺10月9號朝早8點為大廈內居民進行核酸檢測，直至核酸檢測係陰性先畀離開[17]。
註
[編輯]攷
[編輯]- ↑ 〈澳門今增一宗確診 裝修群組與隔離酒店保安群組同源 - RTHK〉。news.rthk.hk (臺灣中文)。喺2021-10-06搵到。
- ↑ 〈裝修群組再增1人 越南籍女僱員第75例〉。《論盡媒體 AllAboutMacau Media》。2021-10-05。喺2021-10-05搵到。
- ↑ 〈「裝修群組」越籍男女疑涉非法工作〉。《論盡媒體 AllAboutMacau Media》。2021-10-07。喺2021-10-07搵到。
- ↑ 〈當局宣佈25日零時進入即時預防狀態 離境人士須持48小時內陰性核檢結果證明〉。《論盡媒體 AllAboutMacau Media》。2021-09-24。
- ↑ 〈終止即時預防狀態〉。澳門特別行政區新聞局。喺2021-10-15搵到。
- ↑ 〈本澳新增第64例新冠病毒肺炎輸入性確診病例〉。澳門特別行政區新聞局。喺2021-09-24搵到。
- ↑ 〈本澳新增第65例新冠病毒肺炎輸入關聯確診病例〉。澳門特別行政區新聞局。喺2021-09-24搵到。
- ↑ 〈新冠肺炎｜澳門同一酒店現3確診進即時預防狀態 今午3時起全民檢測〉。明報。2021-09-25。
- ↑ 〈再有兩名保安證實感染 增兩例輸入關聯病例至70例確診〉。《力報》。喺2021-09-28搵到。
- ↑ 〈隔離酒店保安群組被大爆發：再新增一例〉。論盡媒體。喺2021-09-28搵到。
- ↑ 〈【即時】 本澳新增第72例新冠病毒肺炎確診病例〉。論盡媒體。喺2021-10-04搵到。
- ↑ 〈本澳新增第73宗新冠確診病例 患者曾接種兩劑國藥〉。愛瞞日報。喺2021-10-04搵到。
- ↑ 〈本澳新增第74宗確診病例 曾到第72、73例患者單位工作〉。愛瞞日報。喺2021-10-04搵到。
- ↑ 〈澳門再多1宗確診個案 公務員今天起至周四不需上班〉。香港電台。喺2021-10-05搵到。
- ↑ 〈第74與66例患者曾同乘巴士 當局判定「裝修群組」與「保安群組」同源〉。愛瞞日報。喺2021-10-06搵到。
- ↑ 〈本澳新增第76、77宗確診病例 均與確診越南女子關聯〉。愛瞞日報。喺2021-10-09搵到。
- ↑ 〈本澳新增第76、77宗確診病例 均與確診越南女子關聯〉。愛瞞日報。喺2021-10-09搵到。