北園酒家 (廣州)
23°8′20.7″N 113°16′1.3″E / 23.139083°N 113.267028°E
北園酒家（「園」讀「苑」，粵拼：bak1 jyun2 zau2 gaa1），簡稱北園（bak1 jyun2），係中國廣東省廣州市嘅老字號酒樓，喺1928年成立，位置喺小北路202號。呢間酒樓同南園酒家、泮溪酒家夾埋一齊係「廣州三大園林酒家」。
史[編輯]
呢間酒樓喺1928年，由嗰時嘅商會會長鄒殿邦同官僚太太一齊夾手搞。由於嗰時小北路係廣州嘅北邊鄉下地區，加上啲人去白雲山成日經過嗰度，於是上山啲人好自然噉去北園酒家度食飯，人稱「山前食肆、水尾茶寮」。雖然1938年因廣州淪陷而執笠，但1947年由楊仁輔同原北園營業部長陳兆棠、廚師劉蘇、黃珠庭一齊集股開合德公司，請返之前北園嘅原班人馬嚟重頭開檔。
1956年，由於中國內地公私合營，結果嗰時嘅市長朱光話整大間北園，重寫埋「北園」嘅招牌，變成廣州第一間園林酒家，喺1993年同1998年分別評爲中華老字號同國家特級酒家。到咗2006年底就轉畀東悅酒家集團，之後喺2007年2月3號結業裝修，行高檔路線，2008年9月28號重新開放。