北角發電廠
北角發電廠係香港昔日一座發電廠，位於香港島北角電氣道（而家北角城市花園西面一帶）。發電廠用以取代不敷應用嘅灣仔發電廠。選址北角嘅原因，係因為當時北角已經係遠離市區嘅地點。北角發電廠早喺1913年開工，但因為第一次世界大戰影響，延至1919年夏天先至運作。啟用初期，發電廠總發電量大約係3,000千瓦。發電廠前嘅道路，因發電廠而命名為電氣道，而附近嘅大強街亦都同發電廠有關。
响香港保衛戰同香港日治時期，發電廠受到破壞。經過戰後嘅修葺同多次擴建，發電廠能夠應付1950年代嘅大量電力需求。1966年，發電廠總發電量達到34兆瓦。
1977年3月25號，北角發電廠發生火警，引致中區至柴灣一帶一度停電。[1]
隨著城市發展，北角已融入為市區嘅一部份，北角發電廠亦影響附近嘅環境。因此，香港電燈响1968年興建鴨脷洲發電廠，並响1978年正式關閉北角發電廠。北角發電廠原址就發展做而家嘅大型私人屋苑城市花園。[2]
參考文獻[編輯]
- ↑ 《當年今日》，亞洲電視，3月25號
- ↑ 香港電機工程發展趣誌「EE筆寫」 ISBN 978-962-7619-20-8