古無輕唇音

古無輕唇音係大清錢大昕提出嘅聲韻學概念：「凡輕脣之音古讀皆為重脣」，唐末出現輕唇音（[f]、[fʰ]、[v]、[ɱ]），喺古時應該讀做重脣音（[p]、[pʰ]、[b]、[m]）。而粵語裏頭，唔少字嘅讀音引證呢點。

粵語

粵語裏面，有唔少字係文白異讀，當中一部分重印證咗古無輕唇音呢個現象。呢一堆字，白讀音都係重唇音，即係話，以粵拼 b 或者 p 作為聲母，而文讀音就係輕唇音，即係 f 聲母。例如：「仆」字，解做「前仆後繼」時讀做「fu6」，「仆街」讀做「puk1」。「埋伏」嘅「伏」字讀做「fuk6」，講「伏匿匿」時，讀做「buk6」。 類似嘅例子重有好多。

不過，各地中、小學都無「粵語堂」，唔會教細佬仔呢一啲嘢，只有「中文堂」，淨係教現代漢語書面語。所以，多數講粵語嘅人，都淨係識得呢一堆字嘅文讀音，唔知道呢啲字原來重有白讀音。

亦因為咁，雖然佢哋成日將呢啲字掛響口邊，用過無數次，但係都唔知道呢啲字嘅本字係點樣寫，重會以為係無得寫嘅俗字、方言字，唔知道呢啲字其實好古雅。於是，有啲人就會用同音假借字來寫，好似將「浮」（pou⁴）寫成「蒲」；有陣時甚至另造新字：例如有本字「埠」（bou⁶）唔用，偏偏造個「埗」字出來。

其實用本字寫，唔單只更加正宗，重可以令句子嘅意思更加清楚，甚至連外省人都估到係點解添。