啟德車站廣場
 |
啟德車站廣場[1]，香港廣場同公園之一，喺九龍啟德沐安街20號，行政上歸九龍城區，屯馬綫啟德站之上，因以為名。笪地係舊時啟德機場原址停機坪，英文則定名Kai Tak Station Square[2]。車站廣場佔地約12公頃，2021年12月7號第一期開張，第二期2023年12月17日開放，廣場由康樂及文化事務署管理。[3]
廣場係一條由啟德站伸延至啟德體育園嘅主要城市軸線，體育園舉行大型活動時，可以分散觀眾。
第一期佔地約3.5公頃，有草坪同石屎地，並有辦事處，又設有蓋走廊，可以通去啟德大道公園，廣場同公園相連。[4]
主要設施就喺第二期，設施包括2個兒童遊樂場、太極廣場、草地滾球場、單車練習場、寵物共享空間。最大特色係大型水景及倒影池，平靜水面會反射天空同周邊建築，形成廣場最具代表性嘅景觀。
周圍而言，第一期東南一側，有住宅煥然壹居、啟朗苑以及啟德1號。西北邊有商業項目AIRSIDE，住宅天璽•天同崇光百貨SOGO啟德店（雙子匯1）同埋SNDO 三道（雙子匯2）。第二期東南面有啟德體育園，西南面有啟德簡約公屋、啟欣苑、啟悅苑、啟盈苑、啟陽苑以及房協居屋。
問題
[編輯]水景圍封爭議
[編輯]啟德車站廣場入面有一個水景休憩空間，由於水面可以清楚映照啟德一帶嘅景色，因此被附近居民稱為「啟德之鏡」，亦成為區內熱門打卡位。
不過，啟德體育園係2024年12月初舉行連串測試賽，康文署以疏導人流同保障安全為理由，用花槽同欄杆將水景範圍圍起，令原本開放嘅景觀受到影響，亦引起唔少街坊不滿。近月有居民更集體致電「1823」提出投訴，要求當局恢復原有設計。當區立法會議員楊永杰表示，康文署通知會將廣場嘅水景回復原貌。不過，日後如果啟德體育園舉行演習或者測試活動，當局仍然會因應實際人流情況，暫時用圍欄封閉部分位置。[5]
市民被渠蓋割傷 政府部門無交代責任係邊個
[編輯]2026年8月1日，一個10歲男童同家人去啟德體育園睇足球表演賽，途經港鐵啟德站D出口附近時發生意外。男童跑去避雨期間踩到地面一塊銀色坑渠蓋後跣低，右腳小腿撞到渠蓋位置後被嚴重割傷，傷口相當嚴重，去到深可見骨。之後送院接受全身麻醉手術，除咗縫合傷口，仲要進行神經線接駁。據報涉事位置唔屬於港鐵範圍，但現場一名保安員未有積極協助，最後只有港鐵車站員工幫手。《香港01》向多個機構同部門查詢。港鐵表示係車站外範圍，唔屬於港鐵管理。康文署、路政署，地政署則回覆話，渠蓋位置並非佢哋管理。[6]
來源
[編輯]- ↑ 〈啟德車站廣場一期及啟德大道公園明日啟用〉。
- ↑ "Phase I of Kai Tak Square and Kai Tak Avenue Park to open tomorrow".
- ↑ 〈啟德車站廣場二期本星期日正式啓用（附圖）〉。政府新聞公報。2023-12-14。喺2026-07-30搵到。
- ↑ 〈【啟德好去處】啟德車站廣場一期正式啟用 綠油油草坪啱晒打卡 文章來源: 【啟德好去處】啟德車站廣場一期正式啟用 綠油油草坪啱晒打卡〉。《香港經濟日報》。2021-12-19。
{{cite news}}: Text "香港經濟日報 https://ps.hket.com/article/3135034" ignored (help) - ↑ 〈【Emily】圍封惹議 「啟德之鏡」將復原貌 體育園測試期改用圍欄 議員：順民意〉。《明報》。2024-12-04。喺2026-07-30搵到。
- ↑ 〈啟德站外渠蓋如利刃 10歲童跣倒割傷腿深見骨 須手術駁神經線〉。香港01。2026-08-05。喺2026-08-16搵到。