國民革命軍北伐

國民革命軍北伐，又叫做國民政府北伐、中國國民黨北伐或者蔣介石北伐，係喺1926年去到1928年之間，中國國民黨領導嘅國民革命軍向北洋軍閥發動嘅內戰，因為國民革命軍嘅戰場係由南向北推進，所以又簡稱做「北伐」或「北伐戰爭」。

1926年7月9號，國民政府成立國民革命軍，由蔣介石擔任總司令，首先喺廣東起兵，連奪長沙、武漢、南京同上海爾啲主要嘅城市；進攻到華中嘅時候，國民政府內部因為對蘇聯同埋中國共產黨態度唔同而分裂，令到北伐陷入停頓。寧漢合流後，國民革命軍繼續北上，加入西北馮玉祥、山西閻錫山之後，1928年6月攻克京兆地方。奉系軍閥、安國軍總司令、安國軍政府海陸軍大元帥張作霖由北京撤去東北，但之後就因為皇姑屯事件而被炸死，佢個仔張學良喺嗰年年底宣布東北易幟，歸順國民政府。

國民政府喺北伐戰爭中，除咗透過直屬嘅國民革命軍之外，都吸收咗中國各地嘅反北洋勢力，成功將北洋軍閥同埋佢哋掌控嘅北洋政府瓦解。北伐結束之後，國民政府完成咗形式上嘅中國統一，成為喺國際上唯一代表中國嘅政權。