大曆詩風

大曆詩風（粵拼：daai6 lik6 si1 fung1），係指唐代大曆到貞元年間活躍嘅詩人所共有嘅創作風貌，喺唐詩中係盛唐詩風轉變爲中唐詩風嘅過渡期。

大曆詩風中嘅大多數詩人喺後生時度過開元時嘅太平盛世，受盛唐文化薰陶；之後安史之亂近十年動亂，對佢哋心境有明顯影響，痛定思痛，覺得自己無能衰老，於是無咗盛唐士人嘅精神風貌。於是大曆詩風無咗盛唐詩風嗰種自信氣勢，講到社會現實時亦無激憤情懷，雖然少量作品有盛唐餘韻，亦都寫民生疾苦，但大多數作品表現出孤獨寂寞嘅冷落心境，追求清雅高逸嘅情調，由盛唐嘅雄渾氣概轉爲淡遠情致，喺詩歌意象上變得細緻省淨，表現出寧靜淡泊嘅生活情趣，雖然有風味，但風骨頓衰，顯示出中唐詩風嘅面目。

時代背景

安史之亂係唐朝由盛轉衰嘅標誌，喺之前嘅和平年代，士人有好強嘅功名心，想由文事立致卿相，戰爭爆發後，武將有咗用武之地，而文士排斥到社會邊緣，再都無咗原先嘅錦繡前程。於是啲人諗返起之前，會覺得恍如隔世，再睇返現實，覺得自己生不逢時，於是原先熱切嘅仕途慾望轉變爲消極避世嘅隱逸情懷，所以寫嘅詩有比較多嘅無奈嘆息同冷落寂寞嘅情調。

戰亂毀滅咗呢代人後生時意氣風發嘅生活，帶來希望幻滅嘅黯淡現實。盛唐嗰種昂揚奮發嘅精神、樂觀、慷慨，變成遙不可及嘅追憶，而平心靜氣嘅孤寂、冷漠、散淡瀰漫成個詩壇。

詩境詩技

喺題材方面，大曆詩風同前人差唔多，而藝術上追求嘅清雅閒淡繼承自盛唐時王孟嘅詩風。構成詩境嘅係詩人所用嘅詞語色彩，同詩技相關嘅係意象運用，呢兩方面大曆詩風都有自己嘅特點。

由於大曆詩人多數有生不逢時嘅感慨，意氣消沉，所以揀嘅詞多數有悽清、蕭瑟寒冷、黯淡嘅色彩。比如劉長卿鍾意詠秋風、夕陽，呢啲詩都係悽清蕭瑟嘅秋季色調，另外喺其他詩人度，秋風、落葉、夕照、寒雁呢啲色調冷淡嘅詞好常見，由於詞語色彩黯淡清冷，以致大曆詩畀人淒涼蕭索嘅風格印象。

意象運用上，一般透過象徵性意象同描述性意象表達寂寞冷落嘅情緒。象徵性意象常見於劉長卿嘅詩，由於佢偏重主觀感受，所以唔對事物做工筆上嘅描寫，運用意象時有好強嘅情緒化傾向。譬喻「青山」呢個意象象徵住鄉下，用來表達愁苦嘅人生之旅嘅歸宿地，又譬喻「白雲」象徵隱逸、高潔，「孤舟」象徵漂泊不定，「夕陽」象徵衰敗消沉，呢啲象徵性事物好多係隱喻詩人情緒，而唔係描述寫實。呢種意象運用特點係暗示、意蘊豐富，運用時相對有彈性，但壞處在於會淪爲特定情緒、意蘊嘅固定符號，以致變成程式化表達，用得多乃至無咗新鮮感。

描述性意象多見於十才子等人嘅詩，亦即對事物用白描手法，來創新意象。由於寫實傾向，會追求對事物刻畫嘅精確、具體，從細微處去感受體認，逼真噉帶出清幽韻味嘅細境界。刻畫嘅意象可以係生活常見嘅事物，力求刻畫得精緻細巧。描述性意象可以確保意象新鮮，但要求詩人要仔細觀察世界、明辨物象，然後再傳神寫出。相對來講因爲集中注意力於啲細事細物、小情小趣，大曆詩人開拓出前代人未留意過嘅小世界，成爲新嘅詩境。但太過執着於細微細眼嘅描繪，會令境界流於狹窄，令全篇意境唔融渾，而且注重描寫而容易顯得雕琢，以致容易有佳句而冇佳篇。

主要詩人

大曆詩壇主要有兩大詩人群體：一個係大曆十才子爲首嘅詩人，活躍喺長安、洛陽，多數係題贈送別詩；遞個係長期喺江南任職嘅地方官詩人，如劉長卿、韋應物、李嘉祐、戴叔倫等人，多數係詠山水風景嘅詩。下面係一啲主要詩人：

參攷資料

袁行霈、羅宗强。〈第四編隋唐五代文學：第五章大曆詩風〉. 《《中國文學史》》。高等教育出版社。
蔣寅。《《大曆詩風》》。鳳凰出版社。
蔣寅。《《大曆詩人研究》》。中華書局。