希望之黨 (2018年)

希望之黨（日文：希望の党）係日本嘅一個政黨，由當初唔想同民進黨合併嘅舊希望之黨議員組成，兼且沿用舊名運作。

歷史

喺2017年嘅眾議院選舉，由小池百合子臨時拉伕嘅希望之黨成績好差，結果選後小池話要「專注都政」，退出希望之黨嘅運作，黨代表個位由出身民進黨嘅玉木雄一郎接棒。玉木做咗黨代表之後已經開始同其他在野黨傾合併嘅事，包括舊東家民進黨。不過黨內嘅保守派議員因為政見、立場唔同而反對合併，到咗2018年4月，舊希望之黨同民進黨已經決定合併，希望之黨嘅保守派就提出分黨，2018年5月7號，以松澤成文為首嘅2個眾議員同3個參議員組成新嘅「希望之黨」。

2019年參議院選舉，希望之黨嘅2個參議員任期已經到咗，但係佢哋都放棄連任，希望之黨嘅議席由5席減到3席。同時黨代表松澤成文希望同日本維新會合併，不過其他議員都唔認同呢個建議，松澤辭咗黨代表，冇幾耐重加入埋日本維新會，呢個時候嘅希望之黨得返2個眾議員。黨代表一職就由中山成彬接任。

2020年，希望之黨解散咗自己嘅黨團，同啱啱成立嘅新國民民主黨合組黨團。

2021年，井上一德退出希望之黨，成個黨得返中山成彬一個，不過井上仍然留喺同國民民主黨合組嘅黨團入面。

2021年10月6號，中山成彬宣佈退休，唔出選嚟緊嘅眾議院選舉，重喺10月1號已經將希望之黨解散。