廈門炒米，係一味香港嘅炒米粉，唔少茶餐廳、大牌檔同酒樓有得賣。雖然個名叫「廈門」，但係廈門冇呢隻米粉，道理同星洲炒米一樣。
廈門炒米冇固定煮法，但個味都會整酸酸甜甜。傳統上廈門炒米嘅酸甜味會用到五柳菜，但亦有人會用酸子薑或者酸蕎頭取代，甚至齋落茄醬就算數。其他配料就同星洲炒米似，譬如會落蝦、叉燒、雞蛋、火腿絲，芽菜。
