廣州公交

出自維基百科,自由嘅百科全書
Jump to navigation Jump to search

廣州公交廣州市政府出錢搞喺廣州市嘅巴士事業。到而家為止,喺廣州地區由第一、二、三巴士公司壟斷嗮成個廣州嘅巴士市場。而家嘅廣州巴士都重喺度發展緊。

[編輯]

黃包車時期[編輯]

喺19世紀尾,廣州市入面嘅主要交通工具都係喺日本進口嘅黃包車,而所謂嘅「黃包車」重可以嗌「東洋車」。喺嗰時,由於巴士重未普及,嗰啲黃包車其實都係啲舊式木輪車,而廣州市入面營運緊嘅黃包車公司——利源、協安、大益、安樂等10幾間公司有成200部黃包車咁多。而黃包車係可以按路線跟住個門牌度送過去,都幾方便下,而黃包車嘅生意都做咗好耐,嗰時嘅黃包車係廣州市入面嘅主要交通工具。

汽輪車嘅流行[編輯]

由於黃包車入咗中國之後就俾人改咗好多次,一直改到汽輪車嘅版本為止。喺嗰時,啲人重喺度升緊黃包車嘅級嗰陣就出咗一批腳踏三輪搭客車,喺腳踏三輪搭客車出現咗之後,黃包車就開始淘汰啦。

巴士嘅出現[編輯]

到咗1920年,嗰時嘅由於有好多搭客車出嚟馬路度行,喺廣東電車有限公司[1]喺鬼佬地區買咗批鐵輪貨車嚟改成個搭客汽車,嗰時因為品質好差,搞到猛咁出交通事故而俾政府禁咗。到咗1922年,加拿大華僑蔣壽石,就喺加拿大度買咗15部舊嘅貨車返嚟,上面加個頂篷同兩排長嘅座凳嚟搞成嘅8座客車。嗰時重辦咗廣州嘅第一間巴士公司嚟推廣巴士業務。嗰時有首廣告歌都幾㷫下:「搭上加拿大,快趣好世界;行路嚤得多,車仔冇咁快;一粒銀芝麻,快搭加拿大。」

「火柴盒」時期[編輯]

廣州最早嘅巴士,係「火柴盒」嘅版本,嗰時每部有8位員工,而呢班員工喺分咗甲、乙兩班,而且每班4位(1位司機+1位助手+2個賣飛佬)。而且部巴有2棟門嚟畀乘客上落車,而大門係由賣飛佬自己逳手嚟拉嘅。嗰時喺交通繁忙或冇乜車嗰陣,部巴士逼到至少50個人係好閒。嗰時嘅「火柴盒」汽車公司,大部分都係港澳同國外華僑嘅私人股份企業,喺1926年,利行、利民、國民、模範呢4間公司攞咗巴士嘅辦理權。喺1926年~1928年,嗰時凈係得10部巴士咁少,後嚟過咗1年又加咗10部巴士,同而家嘅巴士重差咗好遠。

到咗1931年,福利、利行、中華、通行、僑商、德記、廣華、利南、模範呢9間公司攞咗第二次辦理巴士名額嘅公司份,嗰時喺政府招商嚟辦,就搞咗成百幾部巴士出嚟。喺20世紀30年代初期,嗰時金融比較穩定就出現咗廣州市嘅交通繁榮現象。而解放初期就出咗12條市區嘅巴士線路。

而所謂嘅「火柴盒」巴士喺20世紀60年代尾就淘汰嗮喇。

巴士同電車公司嘅成立[編輯]

喺第一部國營公共汽車行咗之後,就喺1953年1月成立咗廣州市第一公共汽車公司,主要係搞廣州市入面嘅巴士營運。嗰時有198部巴士:國營87部、私營111部。而廣州嘅第一部巴士係從東山往返黃沙嘅1號車(而家重喺度,不過線路變咗係東山往返芳村花園)。到咗1959年2月,由於廣州無軌電車成立,嗰時就整咗條從農林下路去到解放路越秀公園條路線嚟營運。而廣州市嘅第一條無軌電車線路喺1960年9月30號正式通車。

依卡路斯客車時期[編輯]

喺1954年,廣州就喺匈牙利買咗第一批依卡路斯客車嚟搞巴士客運。喺20世紀60年代,嗰時重係比較靚嘅巴士。但係由於發動機好渣屎,重有行緊發動機又鬼咁落後,甚至係剎車系統失靈。所以呢部巴士喺20世紀70年代就冇嗮喇。

「通道車」時期[編輯]

到咗20世紀70年代中葉,嗰時嘅廣州市客車裝配廠出咗部巴士,而呢種巴士就係由依卡路斯客車改裝,改成咗通道巴士,而呢種有14.2米咁長嘅巴士,實際係用咗兩節車廂嚟整嘅(同而家嘅BRT長車差唔多),可以坐到150幾個人。嗰時,喺兩節車廂入面都各派咗位售票員出嚟。由於車身好長,乘客又多,所以售票員同司機都搞咗句「特殊暗號」嚟溝通。而所謂嘅「特殊暗號」就係㩒下個唥鐘,響到噉嘅嘢就係以下噉解:

  • 1短——有人要落車
  • 2短——請閂門
  • 1長——車入面有突發事件或危險,司機要停車。

由於呢種巴嘅車身太長啦,加上用咗好多佔地面積,相反重唔夠靈活,又行得鬼咁慢,所以喺20世紀80年代尾就冇嗮喇。

無人賣飛巴士[編輯]

到咗1993年,廣州市率先喺成個中國入面搞無人賣飛,而呢種無人賣飛行為就一直行到而家。喺未有無人賣飛巴士之前,重出現咗巴士賣飛佬喺到站嗰陣拍個車廂嘅身嚟吸引乘客上車嘅[2]。不過無人賣飛巴士出現咗之後就冇呢隻歌仔唱喇。

廣州牌時期[編輯]

典型嘅廣州牌巴士內籠。兩邊都係趟窗,仲有天窗。凳係木板間條。
內文: 廣州客車廠

喺1993年就出咗前門上、後門落嘅巴士。而呢種巴士係由廣州客車廠出嘅廣州牌客車,嗰時廣州客車廠(喺2000年破咗產)都幾犀利下,而廣客甚至重賣到斷貨都有。就係噉,嗰時廣客重創咗賣出1300部巴士嘅記錄。[未記出處或冇根據]而廣州牌嘅巴士一直去到2005年12月23號先至淘汰嗮。

空調車時期[編輯]

喺1992年,廣州市就出現咗第一部空調巴,而嗰時第一部空調巴喺一汽嘅202號巴士開始搞嘅。喺開咗呢條綫無耐,重掛住幾大隻嘅「美國冷巴正式投入運行」(簡化字:美国冷巴正式投入运行)呢啲字。後嚟呢種巴喺1995年俾國務院發展研究中心頒發咗「第一條冇人賣飛嘅巴士」同埋「中華之最」嘅榮譽證書。而本土第一條用國產空調巴士嘅係1994年嗰陣嘅180號巴士。而空調巴重喺廣州入面霸嗮主流一直到而家,重攞埋熱狗巴士嘅位。而廣州嘅最後一部熱狗巴士喺2013年10月9號深夜正式退出咗歷史舞台。

雙層巴士[編輯]

喺1985年,廣州市政府率先喺香港買咗部分雙層巴士嚟廣州行,不過嗰陣時都係啲差唔多退役嘅德國同英國出嘅巴士,維修嘅成本比較高,重有高架橋嘅高度又好矮。結果雙層巴士喺1999年開始慢慢噉退出,到2003年冚唪唥退出嗮。

到咗2009年9月雙層巴士重出江湖,不過呢啲車一直都冇上車牌,搞到俾人以為係非法。到咗2015年6月29號,公交226有咗真正雙層巴,用嚟疏導客流。

而家[編輯]

到而家為止,廣州市有成幾千條巴士、電車同BRT線路,佢係廣州入面嘅其中一個主要交通方式。重有新開通嘅有軌列車。由於越嚟越多廣州嘅地鐵路線開通(包括埋廣佛線、APM,已經開通咗九條線),所以廣州市嘅交通發展思路變成「地鐵為主、公交為輔」嘅觀念。而呢啲思路就令好多經典嘅路線取消或縮短咗。

睇埋[編輯]

參考[編輯]

  1. 唔係而家嘅電車巴士集團。廣州電車巴士集團喺1958年成立,2009年同第一巴士公司合併。
  2. 越秀公園嘅鎮海樓博物館入面嘅廣州巴士簡介有提到噉嘅事。

出面網頁[編輯]