廣州體育館 (1957～2001)

  呢篇文講拆咗嘅流花廣州體育館。想搵同名新啟用嘅體育館嘅話，請睇廣州體育館。

廣州體育館

基本資料
位置	中國廣東廣州越秀區 流花路同解放北路交界西北角 越秀山正門對面
業主	廣州市人民政府
容納人數	5,600
建築
施工	1956年
啟用	1957年10月2號
關閉	2001年5月18號
建築費	CNY￥1,960,000
建築師	林克明、楊思忠、龍炳芬、譚伯康

廣州體育館（粵拼：gwong2 zau1 tai2 juk6 gun2）係廣東廣州舊底一間體育場館，喺1957年10月2號起好，2001年5月18號拆咗，位置喺越秀區流花路同解放北路嘅交界西北角。

佢曾經係華南地區最大嘅體育場館，亦係廣州建築史嘅緊要建築之一，見證咗廣州公共建築由英法到蘇聯風格嘅過渡。

負責方

間嘢係著名畫則師林克明負責，廣州第一建築工程公司負責施工。

建築概覽

建築面積1.86萬平方米，入面用咗大跨度反樑薄板鋼架結構，跨度49米，高度22米，樣似長方形，屬室內體育館，四面觀眾席夾埋有5630個座位，左右兩邊亦整咗兩層樓高嘅舉重室、乒乓波室、羽毛球室、拳擊室、擊劍室等。北面有運動員休息室、更衣室、沖涼房同埋廁所。後座係練習館。

史

間嘢喺1956年9月開工，1957年9月起好。同年10月2號正式揭幕，嗰日最先搞穗港澳乒乓球賽，嗰時包括港隊球員——容國團有出席。唔少廣東本土體育健將——例如乒乓波世界冠軍——梁麗珍，羽毛球世界冠軍——侯加昌、庾耀東、關渭貞，體操世界冠軍——許志強，技巧世界冠軍——黎少文，舉重世界紀錄創造者——陳滿林、陳偉強等人都嚟過廣州體育館訓練同比賽。期間亦辦過各類演唱會，包括崔健、陳慧嫻、草蜢、李達成、陳汝佳、湯莉等人都喺呢間體育館唱過。

拆除

内文：越秀公園站

直到2000年前後，廣州地鐵因為話搞2號綫，必須要喺體育館一帶起越秀公園站同通去廣州火車站嘅區間隧道，當局認為若果唔拆體育館，會對施工造成好大難度，廣州市府為咗大大噉降低施工嘅風險決定拆咗渠，卒之喺2001年5月18號炸低咗呢間體育館。呢次爆破拆除亦被冠名做「中國第一爆」。

後續

體育館拆咗之後，原先喺體育館附近嘅越秀公園總站、廣州體育館總站嘅巴士站冚唪唥嘅路線都取消嗮，啲車都冚巴林轉場到機場路電車總站入面，亦有啲巴士改線路到第啲巴士站停。雖然原地皮喺2002年10月成為錦漢展覽中心用地，但随住2012年11月最後一次展覽結束之後，同年月8號正式停業兼拆卸，地皮到而家都未有動靜。

睇埋

• 廣州錦漢展覽中心