徐小鳳

出自維基百科,自由嘅百科全書
跳去: 定向搵嘢
徐小鳳
歌手
原名 徐鄖書
英文名 Paula Tsui
花名 小鳳姐
國籍 Flag of Canada.svg 加拿大
Flag of Hong Kong.svg 中國香港
出世 Flag of the People's Republic of China.svg 中國湖北武漢武昌
職業 歌手
音樂類 粵語流行音樂
活躍年代 1970年代1990年代
唱片公司 文志 / 永恆 / 新力 / 康藝成音 / 寶麗金
網站 徐小鳳全球歌友會

徐小鳳粵拼ceoi4 siu2 fung6*2Paula Tsui1949年1月1號—,原名徐鄖書(登記嘅名)),人稱「小鳳姐」,香港殿堂級歌手,喺19701990年代活躍喺香港歌壇。

徐小鳳有六兄弟姊妹,自己排最大,細個由中國大陸鄉下湖北武昌嚟香港定居。到香港之後,父母繼續經營食品生意,佢因為要幫父母打理店務同埋睇住細佬妹,所以讀到中二就輟學。

1965年,徐小鳳報名參加咗一項由天天日報同埋「南國試驗劇團」聯合兩家公司舉辦嘅「香港之鶯」歌唱比賽,結果同佢一齊報名、積極力爭出閘嘅兩個同學落選,徐小鳳就無心插柳,憑一曲白光嘅《戀之火》登上冠軍寶座。呢個榮銜冇即時為徐小鳳帶嚟特別際遇,因為父母一直認為做歌手要拋頭露面,反對佢從事歌唱事業。不過後嚟,佢成功說服父母,並喺夜總會擔任歌手,幫補家計。徐小鳳喺1969年正式加入樂壇,灌錄唱片。

徐小鳳嘅事業發展有四個階段。佢早期喺文志唱片同埋永恆唱片主要唱口水歌--即係翻唱人哋嘅作品,例如《淚的小花》、《情人的眼淚》、《午夜結他》同埋《愛情的代價》等,直到1978年嘅《大亨》(顧嘉輝曲)先有為大眾熟悉而又屬於自己嘅歌。喺呢個萌芽階段,佢出咗超過廿張唱片;雖然係翻唱人哋嘅作品,但一直受大眾歡迎,銷量幾好。

徐小鳳其後轉投新力(CBS SONY),唔再唱口水歌,真正成為獨當一面嘅歌手,係佢嘅事業轉捩點。喺佢六張大碟(包括離開之後至出嘅一張)中,歌曲以改編日本或歐美樂曲為主,包括《風雨同路》、《人生滿希望》、《夜風中》、《人似浪花》、《黃沙萬里》等,亦偶有本地創作好似《漫天風雨》同埋《風的季節》(都係李雅桑曲)。呢啲都係徐小鳳嘅成功之作,而其中兩首首本名曲--《無奈》同埋《風的季節》,都出自離開新力前嘅最後一張大碟【新曲同埋精選】,嗰陣徐小鳳雖然算係當紅歌手,但未算大紅大紫,聲勢重係唔及甄妮汪明荃,時為1981年

徐小鳳翌年改投康藝成音。期間徐小鳳一度同近乎壟斷電視音樂節目嘅無綫電視鬧得唔開心,因此雙方停止合作。冇咗電視宣傳並冇將徐小鳳打沉,順住新力兩首流行作品嘅氣勢,徐小鳳憑《隨想曲》(顧嘉輝曲)獲得香港電台十大中文金曲獎,並為最高票數獲獎,奠定徐小鳳喺歌壇嘅不倒地位。其後喺1985年嘅演唱會創下10場紀錄,進一步確認徐小鳳嘅殿堂地位。唔計精選唱片,康藝成音同佢出版咗三張原創唱片、兩張演唱會現場錄音同埋一張重唱國語經典老歌嘅唱片,後者銷量也達白金,可謂異數。除《隨想曲》外,期間嘅成功作品包括本地創作嘅《星光的背影》(林子祥曲)、《情比雨絲》(顧嘉輝曲)、《順流逆流》(蔡國權曲),同埋改編日本樂曲嘅《星星問》、《風裏的呼喚》。

1986年,徐小鳳加盟寶麗金。首張大碟【每一步】至為成功,除同名嘅改編歌外,歌曲重包括後來分別成為無綫劇集《流氓大亨》主題曲同插曲嘅《城市足印》(林敏怡曲)同埋《婚紗背後》(徐日勤曲),後者成為佢嘅首本名曲。呢段期間,其他為人熟悉嘅歌曲有本地創作嘅《冬》(蔡國權曲)、《誰又欠了誰》(鍾肇峰曲)、《一縷情絲》(劉以達曲)及《雙城記》(王傑曲),重有改編嘅《流下眼淚前》同埋《夢飛行》。唔計精選唱片,徐小鳳喺寶麗金出咗九張原創唱片、兩張演唱會現場錄音同埋一張重唱國語經典老歌嘅唱片,而1991年嘅《文明淚》係徐小鳳灌錄嘅最後一張唱片。

徐小鳳喺1983年2006年期間,喺香港共開咗169場演唱會(唔計兩場因病補場),徐小鳳可以講係演唱會嘅經典代表人物。特別係1992年嘅43場個唱,根據香港旅遊協會小冊子資料記錄,更被列入嗰時嘅世界紀錄。徐小鳳聲勢嘅顛峰時期,可以話係從演唱會開始,比較有趣嘅係,呢個係喺後輩梅艷芳當紅之後嘅事,嗰時你爭我奪,我一個徐廿二,你一個梅廿八,我再一個徐卅三,演唱會王者之爭方休。後者就係選唱徐小鳳嘅《風的季節》喺歌唱比賽中得冠軍而晉身歌壇。

1989年,徐小鳳獲香港電台頒金針獎,表揚佢喺樂壇嘅卓越成就。

徐小鳳嘅私人生活一向低調,但佢嘅神秘婚姻就幾哄動。徐小鳳喺70年代因為同後來成為香港政壇名嘴同埋香港立法會議員嘅鄭經翰合辦演唱會而結緣,兩人喺1974年結婚,但婚姻只維持咗5年,喺1979年離婚。呢段神秘婚姻直到1994年至被披露出嚟,震撼一時。

出面網頁[編輯]