超強颱風山竹 (2018年)

颱風山竹 Typhoon Mangkhut（英文）
十分鐘平均風速 颱風 （JMA） 205 km/h（110 kt） 強烈颱風 （CWB） 210 km/h（58 m/s） 超強颱風 （KMA） 200 km/h（56 m/s） 超強颱風 （HKO） 250 km/h 超強颱風 （SMG） 240 km/h 颱風 （PAGASA） 205 km/h 颱風 （TMD） 205 km/h（110 kt） 二分鐘平均風速 超強颱風 （CMA） 235 km/h（65 m/s） 一分鐘平均風速 超級颱風 （JTWC） 285 km/h（155 kt）
2018年9月11號嘅超強颱風山竹 2018年9月11號嘅超強颱風山竹
概況
形成日期	2018年9月7號
消散日期	2018年9月17號
最低氣壓	905 hPa
瞬間最大陣風	305 km/h
影響
影響地區	關島、菲律賓、臺灣、香港、澳門、廣東
路徑圖
颱風路徑圖 颱風路徑圖
呢個風係2018年太平洋颱風季嘅一部分

超強颱風山竹（英文：Super Typhoon Mangkhut，國際編號：1822，聯合颱風警報中心：WP262018，菲律賓大氣地球物理同天文服務管理局：Ompong）係2018年太平洋颱風季第22個被命名嘅熱帶氣旋。呢個熱帶氣旋喺2018年9月16號挨晚喺廣東台山登陸。

影響

菲律賓

喺菲律賓，呢個風造成14人死。總共約四百萬人受個風影響。

香港

啲人知道會打風之後，個個都驚，天鴿嘅教訓令到佢哋提早開始預備，結果超市糧食斷貨，膠紙加價，全城嚴陣以待。終於，香港喺9月16號凌晨開始掛八號風球、朝早加到十號風球。雖然個風稍為減弱，而且喺香港以南約100公里掠過，但香港仍然難逃一劫。環流對香港造成嚴重嘅破壞，大廈嘅頂樓鐵皮屋、「天秤」跌落街，玻璃碎裂，十幾人傷，六萬幾棵樹冧低。有幾層高嘅巨浪同海水倒灌，令海邊地方水浸浸爛嘢，地牢個停車場沒頂，名車報廢，海濱長廊損毀。鯉魚門、大澳水浸街，漁村居民要疏散。打完風之後，市容大混亂，好多地方俾颱風破壞，交通癱瘓，但係政府淨係停兩日課而唔停工，激起民憤，特首民望插水。風災後過咗好耐，善後工作重未搞掂。

政府經過檢討後，汲取山竹吹襲後未能宣佈停工嘅經驗，2019年訂立咗「極端情況」機制，畀政府可以喺惡劣天氣過後宣佈停工。

廣東

廣東嘅廣州、佛山、江門、台山、珠海、深圳、惠州、惠東、茂名、湛江、陽江、中山、雲浮、揭陽、汕尾喺9月15號晚黑開始掛橙色颱風警報信號。喺9月16號凌晨，廣州（除從化、增城同花都外）、佛山、江門、台山、珠海、深圳、惠東、茂名、湛江、陽江地區改發紅色颱風警報信號。喺花都出現咗9級大風，廣東珠三角同粵西地區都相繼發佈咗停工、停課、停產嘅公告。9月14號陽江核電站喺微信發訊息，話核電站做好咗全方位防禦準備，包括模擬演練，「為機組保駕護航」。但冇講核電站係咪會停機。

喺9月15～16號晚黑，深圳、珠海、江門、台山、陽江、茂名南邊包括電白一帶、惠州惠東縣都同時掛咗紅色颱風警報信號同埋紅色暴雨警報信號。

16號晚黑珠江水倒灌，廣州沿江畀珠江水浸咗唔少，水位最高到腰，高速路全線唔畀出入，有住沿江路嘅街坊話，住咗呢度四十幾年未見過咁高嘅水位。而海珠新洲碼頭度，街內啲水位到腰，居民要疏散。全省合共疏散245萬人。

廣西

颱風預計17號凌晨1點左近入廣西，上晝10點倒到南寧。陸川縣水利局局長話，發佈咗防颱風全縣動員令，由16號18點至18號午夜零點，全面停工、停業、停課、停市、停運，低窪地同地質災害點嘅居民需冚唪冷撤離避難。