德天瀑布

德天瀑布
喺瀑布景區大門嚿大石附近望去德天－板約跨國大瀑布嗰頭。圖左邊嘅係板約瀑布，右邊嘅係德天瀑布。
座標	22°51′21″N 106°43′22″E
位置	中國廣西崇左大新縣德天村 越南高平省高平市重慶縣潭水社
闊度	120米（394呎，360尺）
高度	60米（197呎，180尺）
落差	70米（230呎，210尺）
瀑布數	3
平均流速	54.6 L/s·m²
德天瀑布 德天瀑布嘅地理位置
山脈專題

德天瀑布（粵拼：dak1 tin1 buk6 bou6；壯文：Dwzngoenz Raemxdiuqdat；越南文：Thác Đức Thiên／錯徳天）係亞洲地區嘅瀑布，喺中國廣西崇左大新縣同越南高平省高平市重慶縣嘅交界，地理上雖然屬中越國界，但瀑布屬中國監管。佢既係北回歸線同雲貴高原南邊近東南亞嘅跨境瀑布，又係歸春河屬下嘅瀑布。

瀑布闊120m，落差70m，豎直深60m；分成三級跌落。佢係亞洲第一大跨國瀑布，亦係繼伊瓜蘇瀑布、維多利亞瀑布同尼亞加拉瀑布之後嘅全球第四大瀑布。曾經喺2005年俾《中國國家地理雜誌》登佢做中國最靚嘅六大瀑布之一。佢亦係好多劇集嘅拍攝熱門地之一，2000年嘅《酒是故鄉醇》同2015年嘅《花千骨》都喺呢個景區入面拍過。喺每年7～11月份，呢個瀑布經常發大水而出靚景。

另外，喺屬下嘅景區附近好多時有邊防差人同軍佬出入巡邏，專門睇有冇喺越南嚟啲人蛇。喺呢個景區大門前嘅德天村，好多時有混雜中國大陸貨同越南貨賣。

景區

瀑布發大水時（2017年7月）

瀑布冇乜水流時（2011年1月）

呢個園區分有山頂景區、山腰公路同水面棧道三部分。

觀景臺

觀景臺喺園區近入口地方，佢可以望到嗮成個德天瀑布同板約瀑布嘅全景，喺每日天晴差唔多太陽落山及晏晝時分比較靚。

觀景亭

觀景亭係山頂景區一部分，喺園區觀光大道入去第一個路口右邊條路上到山頂嘅地方。佢可以望到嗮成個德天瀑布同板約瀑布嘅全景。

觀瀑臺

觀瀑臺喺園區水面棧道最督地方，可以近距離睇到德天瀑布嘅樣。附近亦有兩條路上去中越邊境53號界碑同古砲臺附近。

中心島

中心島係景區嘅其一特色，可以喺水面直接望到德天瀑布同板約瀑布個正面樣。不過佢條路線凈喺國界徘徊，唔入越南境內。

古砲臺

古砲臺係山頂景區一部分，喺園區觀光大道入去，右手邊第二個路口上去山頂個分岔路轉左就搵到。佢係守護中國大陸領土嘅其一砲臺。

中越邊境53號界碑

内文：大清國53號界碑

中越邊境53號界碑係山腰公路最㞘嚿碑，亦係公園嘅西門。嗰嚿牌亦係中國同越南嘅國界。假設從中國嗰邊從東向西過去，過咗嚿碑就係越南。喺越南境內重有集市響度賣越南貨。不過景區成日有邊防差佬同軍佬睺住有冇人蛇出現。

注意事項

喺歸春河兩邊，好多時都見到有中國同越南嘅界碑響度。

瀑布嘅地形比較複雜，加上部分區域嘅水流好急兼水比較深，而且屬中越邊境，所以玩時一定要注意：

1. 必須要按公園入面嘅導航指引嚟行，唔畀入去未經園方批准而開發嘅景區道路。
2. 園區唔畀做破壞環境或亂掟垃圾行為。
3. 未經允許唔畀擅自跨越國界（包括跨欄杆同跳落河游水行為）

   因為河流啲水好急，加上受到瀑布嘅衝擊力影響，好易出現個人財物損失同生命安全隱患，加上嗰度有好多邊防人員同軍佬一日廿四個鐘睇住有冇人蛇出現。凡係擅自游水過去嘅都會俾邊防人員按人蛇處理。

4. 未經允許，唔畀落水或爬喺石頭上邊影相或入去瀑布深處（包括淋瀑布行為）。

   因為瀑布啲水吸力好大，一旦跌落水後會好易衝到越南境內，加上涉及兩國邊防巡查，屆時好難有人幫到你。

5. 園區唔畀做任何形式嘅買賣或燒烤等野炊行為。

   因為景區有中越文提示按照中越有關邊境法律，凡係買賣或燒烤等野炊好易俾邊防差佬或軍佬睇成走私或偷渡行為。

門票同開放時間

開放時間

• 每日08:00～17:00
• 一到每日閂檔時分，邊防人員會強制遊客清場。

門票

• 成人票每位￥80。
• 身高≤1.2m嘅細路：免費
• 傷殘人士（要有殘疾證）／軍人（要有軍官證）：免費
• 年紀＞60嘅老坑（要有個人有效證件）／全日制本科或大專學校嘅在讀學生（要有學生證）／6＜年紀≤18嘅未成年人（要有學生證）：半票
• 記者（要有記者證）／至少10人嘅旅行社團隊：每位￥70。
• 旅行社導遊（要有行程單同埋導遊證）：免費

注意：門票喺園區出入口東南角3.2km嘅地方先至有得賣。

水上竹筏

同公園門票唔互通。唔理係咩人都好，每位￥30。

中越邊境53號界碑

景區凈限每日晏晝開放，其他時段唔畀除邊防部隊人員、軍佬或邊防差人之外啲閒人出入。喺每日啱天光無耐，挨晚、晚黑時分、上晝期間，凡係閒人出入時必須要有護照或邊防證先至畀入去過境。

睇埋

• 板約瀑布

攷

• 德天瀑布 梦之旅
• 德天瀑布 乐途旅游
• 德天瀑布简介 艺龙旅游

出面網頁

• 德天瀑布嘅官方網站