懵仔針

懵仔針（粵拼：mung2 zai2 zam1）係種叫作氯丙嗪 嘅精神病藥針（劑），氣味濃烈，標準用途係醫精神分裂症，不過副作用好大。由於長年以來，香港獄警經常用呢種會令人懵懵懂懂嘅藥來虐待囚犯，令受害者承受嚴重後遺症，甚至當場喪命，坊間多數用個衰名，而非學名來稱呼爾隻藥。於濫用時，被打呢種針嘅人，會好快變得意識迷糊，甚至無埋知覺，之後重可能會嘔、唔想食嘢同埋抽筋，分量若果夠多，重會死人添。

酷刑用

有啲政治犯會俾人反覆噉樣啪呢種針，搞到神智癡呆，甚至精神崩潰。

喺香港，周文立放監之後，向記者憶述，喺赤柱監獄踎緊嗰陣時，因為唔聽話，所以俾人運咗去小欖精神病治療中心，喺「A1」囚室住咗三個月，期間有廿幾日俾人打懵仔針傍埋用其他手段虐待——職員夾硬打咗藥性輕嘅水劑針之後，渠就變得呆滯同覺得好眼睏，等到幾乎瞓着，就來踢醒……由朝頭早折磨到半夜，直至屈服到跪求熄燈畀渠瞓……就連將有其他人精液嘅底褲着上身呢種離譜命令，都唯有照跟；渠見過打咗針筒大到似足球氣泵，藥性重嘅油劑嘅人，恐佈到好似點咗穴，重聽過有人就噉中毒死咗。

何毓桓話畀梁耀忠知，自己被圂喺赤柱監獄時，有個高級主任由於歧視大陸人，指揮一班囚犯圍毆渠，並搵心理官對其陷害，繼而踢去小欖精神病治療中心；喺嗰處，無患精神病嘅渠被連續三日，早晚打懵仔針虐待。

醫療用

喺香港，會用喺監躉同埋精神病人度。懲教署守則規定，喺監獄同羈留病房入邊，只有當囚犯想自殘自殺，或者道友典癮，至准用來拮渠哋；之前要攞到醫生處方，之後重要記低詳情。

廣義啲講，其他鎮靜劑都有時叫「懵仔針」（不過有專家覺得噉係個謬誤）。例如：用內窺鏡檢查大腸之前，會用來令人心情同肌肉放鬆，跟着無咁唔舒服；精神科病人情緒失控得太緊要嗰陣，都會用到渠。舊時有無良瘋人院，向病人打好多懵仔針，高壓管理。