手掌笠 (民間故事)

烏克蘭喺二零零一年出嘅《手掌笠》郵票

一九一六年故仔

《手掌笠》（粵拼：sau2 zoeng2 lap1；烏克蘭文：Rukavichka / Рукавичка），烏克蘭嘅民間童話故事，講有人跌咗手掌笠喺樹林處，一班動物接住縮入去保暖。唔止烏克蘭，東斯拉夫各地（例如俄羅斯南部）都有類似嘅故仔。呢個故仔十九世紀已經有人收集，因而有文字記載。

基本情節

《手掌笠》係一個民間故仔，有多個版本喺坊間流傳，不過呢啲唔同版本喺情節上都有某啲共通點。以下係其中一個版本。

話說故仔發生喺一個冬天嘅朝早。森林嗰度落晒大雪噉好凍。有一隻青蛙同一隻地鼠搵到一隻手掌笠，就為咗取暖捐入去。佢哋入到去覺得又真係幾舒服，就決定喺隻手掌笠入便住。

無幾耐，一隻兔仔嚟到，兔仔話佢對耳仔就快凍到僵晒咁滯，青蛙同地鼠就畀佢入去隻手掌笠度取暖。

過咗陣，一隻狼同一隻狐狸嚟到。狼同狐狸都覺凍。手掌笠入便嘅動物就好心，畀佢哋入埋嚟取暖。隻狼好大隻，要用力一推先至捐得入隻手掌笠裡便。

打後，有一隻好大嘅熊人jan2嚟到。佢開口，問有無人喺隻手掌笠裡便。地鼠同佢班朋友回應：

「我哋喺隻手掌笠入便，好暖呀！」

熊人都覺凍，想捐入去手掌笠裡便，但係佢大隻得滯捐唔入。兔仔就話：

「你太大隻喇！呢度無位畀你呀！」

但係熊人哀求：

「畀我入嚟啦！出面好凍呀！」

於是兔仔同佢班朋友，就試吓喺手掌笠入便空啲位出嚟畀熊人。

「唔好推我！」

「行去嗰邊！」

「哎吔！你踩到我條尾喇！」

佢哋推嚟推去，熊人跟住就忍唔住打咗個乞嗤，個乞嗤好大，吹到隻手掌笠飛咗上天。個故仔最後一句係噉嘅：

「你哋知唔知隻手掌笠係邊個嘅？原來隻手掌笠係聖誕老人嘅！」

版本差異

故仔版本好多，手掌笠邊個嘅，有乜動物，結局點樣等等，都係啲人自由發揮，加鹽加醋，各有各講。一般開頭，總之有個人跌咗手掌笠，細蚊仔有，老人又有。動物，一隻一隻咁加入去，入去之前會問裏面動物，入唔入得去暖，跟住大家話可以。至常見次序，有鼠，有蛙，有兔，有狐，有山豬，有熊。有啲結局會話，個笠頂唔順畀佢哋掙爆咗，最後就個個都無得暖。又有啲結局話，個笠嘅主人返樹林，啲動物驚到走晒。

詮釋

睇埋：公用品悲劇

有評論者指出，《手掌笠》呢個故仔係講緊公用品悲劇呢種現象。公用品悲劇係經濟學等領域上講到嘅一種現象，指人分享某啲「大家齊齊共用」嘅資源嗰陣，往往都係以自身利益為優先，個個都爭住開採或者利用嗰種資源，最後就搞到個資源枯竭，大家都無得享用。喺《手掌笠》個故仔入便，隻手掌笠係一種共同分享嘅資源（無任何一隻動物擁有隻手掌笠），於是啲動物就隻隻都爭住去享用（入去取暖），而喺好多版本入便，佢哋隻隻爭住走入去，最後就搞到隻手掌笠畀佢哋掙爆咗（大家都無得用）—被指係好似現代經濟學講緊嘅公用品悲劇現象。