桂花

  提示：呢篇文講嘅唔係月桂或肉桂。

  「桂樹」跳轉到呢度。想搵樟屬嘅樹，請睇「陰香」。

How to read a taxobox 桂花
喺中國浙江省杭州市入面嘅桂花
物種分類
界 植物界 Plantae 門 被子植物門 Magnoliophyta 綱 雙子葉植物綱 Magnoliopsida 目 唇形目 Lamiales 科 木樨科 Oleaceae 屬 木樨屬 Osmanthus 種 桂花 O. fragrans
二元學名
Osmanthus fragrans Lour.

桂花（粵拼：gwai3 faa1；學名：Osmanthus fragrans）；簡稱桂（gwai3）；又叫月桂（jyut6 gwai3）或岩桂（ngaam4/aam4 gwai3）；第個名係九里香（gau2 lei5 hoeng1）或金粟（gam1 suk1）；喺中國嘅部分北話地區叫木樨（muk6 sai1；簡化字：木樨）；喺英文區叫做「sweet olive」、「sweet osmanthus」、「tea olive」或「fragrant olive」，喺日本叫木犀（muk6 sai1；日文：木犀／モクセイ）；喺印度叫斯蘭（si1 laan4；印地文：सिलंग ），係木樨科木樨屬嘅常綠喬木或灌木。桂花係一樖香花樹種，成日俾人話係「金秋嬌子」。

分佈

呢種樹木嘅原產地喺亞洲。從喜馬拉雅地區東邊、中國大陸西南部、臺灣、日本南邊等地都有野生，甚至喺印度、尼泊爾、柬埔寨都可以見到佢。

形態

呢樖嘢一般有3——5m高，最高可以去到18m。樹皮色係灰啡色。佢嘅葉好似啲牛皮噉，摸上手硬堀堀，而葉邊有鋸齒。一般開嘅係金黃色嘅碎花品種，而且重好細，不過佢啲花香都幾犀利吓。佢啲花好似條管噉，由5個花瓣組成，一個雌蕊。開完花之後結出紫黑色橢圓形嘅細核果。

品種

桂花一般有4個品種：

品種	花色	香味	樹形	註
金桂	黃	最濃	高大
銀桂	淡黃／乳白	有尐濃	有尐高
丹桂	橙紅	好淡	比較矮	花冇咁易甩
四季桂	淡黃	有尐淡	叢生	除咗夏天超熱辣辣或冬天超凍冰冰嗰時之外，其它時間大多數都可以陸續開花。

用途

桂花醪糟

桂花糕

桂花醬

桂花唔係凈得睇，佢可以提取香精或直接用嚟做食品嘅香料。例如做桂花酒、桂花茶、桂花糕等。甚至佢重可以用嚟做藥都得。

藥用價值

桂花嘅樹枝、葉、花、根、花嘅蒸餾液、根皮都可以做藥，有以下呢啲功效：

部位	功效
花	痰多、咳、哮喘、脘腹冷痛、腸風血痢、經閉痛經、寒疝腹痛，牙痛，口臭。
花嘅蒸餾液	胸脅唔舒服、齦腫、牙痛、喉嚨乾燥、燥熱，口臭。
果	胃寒疼痛，肝胃氣痛。
枝葉	風寒感冒、皮膚痕，漆瘡。
根／根皮	風濕痹痛、肢體麻木、胃脘冷痛，腎虛牙痛。

故事

吳剛學仙行差踏錯

喺民間有個古仔，話吳剛學仙嗰時行差踏錯，結果俾朝廷罰到月光度斬桂花樹。點知佢越斬桂樹，就即刻合返埋，成日都好似斬唔冧噉。

「桂林」嘅地名

睇埋：桂林市

喺廣西壯族自治區桂林市有個古仔，話海龍王嘅三公主幫人哋去掘尾龍拜山，點知就搞出咗「桂林山水甲天下」。不過三公主死咗之後就埋咗喺泥度，結果一夜就變咗樖桂樹，重多到好似森林噉。

文化

所謂「市花」

喺中國大陸，廣西壯族自治區桂林市、江蘇省蘇州市、浙江省杭州市、浙江省衢州市同埋安徽省合肥市等嘅廿幾個城市都用咗桂花嚟做市花。

層面

喺東亞地區嘅詩文同傳統習俗入面，桂花成日同秋天，月亮串埋一齊。

地名

中國大陸有部分城市都有用桂花嚟做名嘅，好似廣州同珠海都有條「桂花路」。

花名歌謠

喺中國內地嘅古詩文化入面，曾經有首同花名歌謠有關嘅詩係形容12個月出嘅比較靚嘅嗰啲植物。其中入面講嘅「八月桂花滿樹香 」就係佢。

圖集

美國國會圖書館畀出嚟嘅桂花樹 美國國會圖書館畀出嚟嘅桂花樹  日本街頭嘅桂花 日本街頭嘅桂花  上海中央公園入面嘅桂花 上海中央公園入面嘅桂花  南韓街頭嘅桂花 南韓街頭嘅桂花  桂花嘅花 桂花嘅花  丹桂 丹桂  桂花嘅樹幹 桂花嘅樹幹  四季桂 四季桂

有關嘅書

• 中国少年儿童百科全书 自然·环境 第420页　浙江教育出版社 ISBN·7-5338-1946-2/G·1942
• 茂木透写真 『樹に咲く花 合弁花・単子葉・裸子植物』 高橋秀男・勝山輝男監修、山と溪谷社〈山溪ハンディ図鑑〉、2001年、292-293頁。ISBN 4-635-07005-0。

出面網頁

• 中华桂花之乡——咸安　
• 南京中山陵“桂花隧道”
• 台灣可以看到桂花的地方　
• 桂花 Guihua 藥用植物圖像資料庫 (香港浸會大學中醫藥學院) （繁體中文）（英文）
• Osmanthus fragrans National Center for Biotechnology Information (NCBI)