東山區 (廣州)

  呢篇文講廣州市一個經已撤銷嘅區。想搵其他城市嘅東山區嘅話，請睇東山區。

東山區（粵拼：dung1 saan1 keoi1）係廣州以前一個區，亦係廣州老四區之一。2005年5月併入越秀區。其中東山同新河浦一帶民國時期係有錢人家住嘅地方，有「東山少爺」嘅講法，同西關小姐相對。東山區亦係傳統教育強區。

名

東山區個名嚟自東山口附近嘅東山寺，而間寺又係因為東山一帶喺廣州東邊，而且由丘陵組成而改呢個名。呢間寺明朝成化年間（1480年）建成。如今間寺雖然無咗，但係有好多路名都印證住呢間寺嘅歷史，好似寺貝通津、廟前直街、寺右新馬路呢啲。

範圍

東山區範圍包括而家呢幾個街道：東湖街道、農林街道、黃花崗街道、大東街道、大塘街道、珠光街道、白雲街道、梅花村街道、建設街道、華樂街道。基本上包括而家越秀區裏面大東門外嘅所有區域。

史

開初喺明朝成化年間（1465－1487），總鎮兩廣嘅內官太監韋眷喺廣州城東部（宜家嘅署前路）起咗個永泰寺，後尾又嗌做東山寺。清順治八年（1651）重修東山寺，「東山」由此得名。因寺名而慢慢將寺所在一帶崗台地區叫埋做東山，大概始於清初。

東山未開發之前，原來有三條自然村，一條叫山河村，喺而家嘅新河浦左近，村原居民有姓姚、姓高及姓傅嘅，隨住東山形成市區，好多原居民搬咗去而家嘅農林下路附近。一條叫寺右鄉，喺宜家嘅寺貝底，東邊有一條河涌，由白雲山流向珠江。有七百幾村民姓姚，住喺村東，三百幾姓梁嘅，住喺村西，多數人務農為生。仲有一條叫豬屎寮，喺而家嘅中山二路中山醫嘅門診部附近。條村啲村民就百零人到，多數係種瓜菜，曬豬屎、魚鱗等肥料，運去農村賣，噉樣來搵食。

近世

美國浸信會國外傳道部（簡稱美南差會），1888年（清光緒十四年）喺五仙門（原長堤青年會）創立咗培道女學堂，第一個定落東山做傳教基地。光緒二十九年，美南差會通過華人教徒廖卓庵（又名廖雲翔），同東山寺右、山河兩鄉啲村民疏通咗關係，高價買低兩幅土地起新校舍。呢個係東山最早出現嘅新式建築物。跟著啲教會人士陸續去東山買地，起埋教堂、醫院、社福設施、教育機構等，時有描述：

「

東山本為羊石東郊一荒丘耳。自西方教士築室于此， 以宣傳福音，於是始有居民。後歸國華僑，利其空氣好，地價賤，紛營居室，不十年問崇樓傑閣，重疊聳峙于青山綠樹間，勢殊壯麗。居民既集，而學校，商店、禮拜堂、醫院、警署亦興，……今道路開闢，交通益便，人口益繁，以考人口約千、萬，住房近千。社會既成，遂生風俗。

」

到咗清末民初，教會落腳發展設施同住屋，社區開始成形。啲人慣咗叫寺四週邊街區做「東山」，一路相沿冇改口。民國20年（1931），設立咗東山區公所，呢個係市屬行政區以「東山」命名嘅開始。

1949年解放軍攻陷廣州之後，初時全廣州市分為28個區，有20個係「城區」，東山係其中一個城區。1950年改行政區劃，28個區併成16個，有8個係城區，東山併咗去邊一區不詳。1952年9月再改，8個城區併成5個，東山屬於「東區」。1960年8月又改，設立今日我哋所知嘅東山區。前後經歷咗三次分合同區名更改。

2005年5月廣州市更改行政區劃。東山區撤銷咗，併咗入越秀區，從此消失。