柯伊伯帶

出自維基百科,自由嘅百科全書
跳去導覽 跳去搵嘢


藝術想象圖:柯伊伯帶同假說存在於更遠嘅歐特星雲

柯伊伯帶英文Kuiper belt,又叫倫納德-柯伊伯帶凱伯帶,或者叫庫柏帶)係太陽系海王星軌道(距離太陽大約30天文單位)外面嘅黃道面附近、天體密集嘅中空圓盤狀區域。柯伊伯帶嘅假說最初係由愛爾蘭天文學家倫納德提出,並響十年後再由另一位天文學家柯伊伯再次獨立提出。

柯伊伯帶嘅位置處於距離太陽40至50天文單位低傾角嘅軌道上。以前嗰度一直被認為係咩都冇,係太陽系嘅盡頭。但係其實呢度好熱鬧,有好多直徑由幾公里到成千公里嘅冰封物體。柯伊伯帶上嘅呢啲物體係點成形嘅呢?如果按照行星形成嘅吸積理論來解釋,咁就係佢哋響繞日運動嘅過程中撞倒,互相吸引,最後黏附成一個個大小不一嘅天體,變成而家個樣。

柯伊伯帶係現時人類所知嘅太陽系嘅邊界,係太陽系大多數彗星嘅來源地。自從冥王星被發現,就有天文學家認為冥王星應該排除響太陽系嘅行星之外,而由於冥王星嘅大細同柯伊伯帶入便嘅小行星大細相近,20世紀末更有主張歸入柯伊伯帶小行星嘅行列當中;而冥王星嘅衛星就應被當係佢嘅伴星。響2006年8月嘅國際天文學聯合會已經將冥王星、穀神星同新發現嘅鬩神星一齊歸入新分類矮行星。