楊雪盈
| 楊雪盈 | |
|---|---|
.png) | |
| 出生日 | 1986年11月14號  （38歲） |
| 出生地 | 英屬香港 |
| 國籍 | 英屬香港、中華人民共和國 |
| 母校 | 香港中文大學 |
| 職業 | 政治人 |
| 政黨 | 灣仔好日誌、灣仔起步 |
[改維基數據] | |
楊雪盈（Clarisse Yeung，1986年11月14號—[1]），係香港泛民主派政治人物，第六屆灣仔區議會前主席，灣仔大坑選區前任議員，文化組織「香港文化監察」主席，灣仔好日誌、灣仔起步創始成員。
簡歷
[編輯]楊雪盈中學讀九龍文理書院，之後喺香港中文大學藝術系畢業，而家做緊中大專業進修學院文化管理系嘅兼任講師[2]。
2014年雨遮革命期間，楊雪盈同其他藝術工作者發起「雨傘運動視覺文化庫存計劃」，將佔領區嘅藝術品做紀錄同保存。
2015年香港區議會選舉，楊雪盈參選大坑選區，對手係想接棒嘅新民黨王政芝，最終攞到1,398票，贏咗攞1,148票嘅王政芝[3]。雖然佢乘住雨遮革命個勢出選，但係當選之後多次話自己唔係「傘兵」， 因為促使佢參選嘅係東北發展事件，早過雨傘運動[4]。
2016年，有中資地產商想喺大坑道重建一棟舊樓，同城規會申請話想拎埋隔離個綠化帶，用嚟起佢30層高豪宅嘅私家車道，諮詢期喺同年7月15號屆滿，但有居民發現諮詢期都未過，就已經有工程車喺嗰度搭嗮棚開工，重將個綠化帶既部分樹木斬嗮，嚟擺佢自己嘅建築材料。楊雪盈話，「未批先斬」嘅做法唔合理，亦都引來附近居民不滿，怕會立壞先例咁話：「犧牲公眾綠化地方，變為私人地方」，破壞嗮大坑原有綠油油嘅靚景。佢又話，原本棟舊樓有出入口直達銅鑼灣，依家為咗「墊高」住宅而要破壞綠化地帶嚟起私家車道，重將個出入口移到上大坑道70號嘅計劃唔理想，所以聯同南區區議員司馬文發起聯署，收集居民簽名去信反對[5][6]。同年12月，地產商撤回申請。但喺2017年，地產商將原本份申請改咗幾隻字之後再重新申請，楊雪盈今次夾埋立法會議員鄺俊宇、羅冠聰一齊聯署，繼續收集市民簽名反對[7]。
2019年第6屆香港區議會選舉，楊雪盈繼續响大坑選區尋求冧莊，結果攞到2340票，以907票之差鍊贏對手廖添誠（廖添誠攞到1433票，比四年前嘅王政芝多咗285票），成功連任。之後佢當選做灣仔區議會主席。
2020年6月，佢參與咗香港立法會選舉嘅泛民主派初選。但去到2021年，佢連同另外46名參與或組織初選嘅泛民主派人士被控「串謀顛覆國家政權」罪，主審法官蘇惠德喺3月安排14個鐘馬拉松式聆訊，結果令楊雪盈、梁國雄等四名被告凌晨過後不適送院，其中，楊雪盈因為蘇惠德嘅安排，搞到低血壓、食唔到嘢，要做腦部掃描[8]。之後有部份評論，批評蘇惠德刻意進行馬拉松式聆訊，係濫用司法程序[9]。
2021年9月15號，佢同梁柏堅被裁定2021年香港區議員宣誓入面宣誓無效，即時冇咗區議員席位，而佢留低嘅區議會主席一職，就由黃宏泰繼承。
參考
[編輯]- ↑ 〈2015年香港區議會選舉：候選人楊雪盈簡介〉 (PDF)。原先內容歸檔 (PDF)喺2018年6月13號。喺2016年10月23號搵到。
- ↑ 〈兼任講師楊雪盈：新思維解決社區問題〉。原先內容歸檔喺2016年3月5號。喺2015年11月28號搵到。
- ↑ 〈政治素人楊雪盈：重點非佔領主打地區問題〉。原先內容歸檔喺2016年2月26號。喺2016年9月29號搵到。
- ↑ 〈眾新聞 | 戰友熱情減退漸離開 傘後新星楊雪盈：重新振作勿灰心〉。《眾新聞》 (中文)。原著喺2019-12-24歸檔。喺2019-12-24搵到。
- ↑ 〈申綠化地建私家車道 地產商未獲批先斬樹〉。原先內容歸檔喺2017年3月5號。喺2017年4月13號搵到。
- ↑ 〈中資進駐砍樹起豪宅 楊雪盈斥疑先斬後奏〉。原先內容歸檔喺2016年10月9號。喺2017年4月13號搵到。
- ↑ 〈中資大坑建豪宅再闖關 擬霸綠化地帶建車路〉。原先內容歸檔喺2017年4月15號。喺2017年4月13號搵到。
- ↑ 〈【47 人案】楊雪盈馬拉松式聆訊後暈倒送院 低血壓、無法進食、要做腦部掃描 | 立場報道 | 立場新聞〉。《立場新聞 Stand News》 (英文)。原先內容歸檔喺2021-03-03。喺2021-03-03搵到。
- ↑ 〈47民主派提堂︱大律師批評律政司濫用司法程序 法庭選擇馬拉松式聆訊「唔人道」 ｜ 蘋果日報〉。《Apple Daily 蘋果日報》 (香港中文)。原著喺2021-03-02歸檔。喺2021-03-03搵到。
出面網頁
[編輯]- 〈灣仔區議會 - 灣仔區議會議員資料〉 (繁體中文)。灣仔區議會。
- 楊雪盈嘅facebook頁
 |