歷代志上

《歷代志上》係《舊約聖經》嘅歷史書，天主教譯做《編年紀上》，原本同《歷代志下》係同一卷書，後來翻譯成希臘文嗰時先分成兩部分。

簡介

作者：以斯拉
日期：公元前450年
地點：耶路撒冷

歷代志上下兩卷嘅主要內容係喺唔同觀點複述撒母耳記上下同列王紀上下卷嘅記載。對以色列君主政體嘅記述有兩個主要目的：

1. 說明以色列同猶大兩國雖然遭受種種災難，上帝仍然信守應許，通過住喺猶大嘅人實現佢對子民嘅計劃。為確認呢個信念，呢卷書嘅作者特別注意大衛同所羅門嘅偉大成就，約沙法、希西家、約西亞等人嘅改革工作，始終對上帝忠誠嘅人民。
2. 記述耶路撒冷聖殿崇拜嘅開始，特別說明執行崇拜儀式嘅祭司同利未族嘅制度。作者認為大衛係理想嘅君王。雖然聖殿係所羅門建造嘅，呢卷書認為大衛係聖殿裏面同祭禮嘅創立人。

提要

1. 族譜同名單（1章1節-9章44節）
2. 掃羅嘅死（10章1-14節）
3. 大衛嘅統治（11章1節-29章30節）
   1. 患難同建樹（11章1節-22章1節）
   2. 建造聖殿嘅準備（22章2節-29章30節）