腓利門書

腓利門書（希臘文：Προς Φιλήμονα）唔單止係「外邦人嘅使徒」所寫最短嘅一封信，而且喺成本聖經裏面，只有約翰二書、約翰三書比腓利門書嘅篇幅更短。重有，呢封係保羅唯一嘅「私人」信件，即係唔係正式寫畀一班教會嘅會眾或者一位監督，而係寫畀一位私人朋友，目的係要同呢位基督徒弟兄討論一個特別嘅難題。呢位弟兄好明顯就係有錢嘅腓利門。佢住喺小亞細亞中部弗呂家嘅歌羅西城。

簡介

作者：保羅
日期：61年秋天
地點：羅馬監獄裏面
收信人：腓利門

腓利門係一個有聲望嘅基督徒，可能係歌羅西教會嘅會友。亦係奴隸阿尼西母嘅主人。阿尼西母喺佢主人度逃走出來，同坐緊監嘅保羅來往。阿尼西母因為受保羅影響而成為基督徒。保羅寫信畀腓利門，送阿尼西母返去佢嗰度，請佢原諒呢位奴隸，歡迎阿尼西母返去，唔單止寬恕呢位出走嘅奴隸，亦要同樣屬於基督嘅兄弟關係來對待佢。

提要

序言（1-3節）
稱讚腓利門（4-7節）
替阿尼西母求倩（8-22節）
結語（23-25節）