沙面

沙面（粵拼：saa1 min2，「面」讀陰上調；英文：Shameen），係廣東省城西關沙基對出白鵝潭北便填海而成嘅島，約莫55英畝。舊時係英法租界，雲集萬國領事館，亦係外籍人士留連之所。

由於舊時島上同時有英法兩國嘅租界，按粵語發音，英文稱佢爲Shameen或者Shamin，法文稱佢做Chamine。

沿革

租界年代

時維西元1857年12月28號清晨，英法聯軍攻佔廣東省城。事隔13日後，英國領事巴夏禮爵士成立廣東事務署（Canton Commission），主政廣州。直至1861年10月21號至交還清國管治。

英治省城時期，見及西關十三行毁於早前戰火，駐華公使卜魯斯爵士（英文：Frederick Wright-Bruce）將重建商舘洋行事務全權交由巴夏禮爵士主理。其時十三行一隅，蓉蓉爛爛，連巴爵士都不禁嘆曰「真係醫翻都嘥藥費」。故此冇原地重建，而改於十三行以西之沙面。

當其時沙面係幾個散收收嘅島仔，角落處有兩坎火炮，早前打仗經已遭英軍炸到巢曬皮，重建真係唔係話咁易。歷時兩年卒之落成。填海之後全島2850呎長950呎闊，北便預留出一條沙基涌，起咗兩墩橋，東便係英國橋，西便係法國橋。埋單計數盛惠三十二萬両銀，英國出五份四，法國出五份一。1861年9月劃定沙面租界，英國順理成章分得多過法國。

英國租界

英國租界地皮凡82幅，每幅90呎×140呎半。英國預留咗6幅地皮楷嚟起領事舘，1幅楷嚟起教堂。1861年2月，巴夏禮爵士隨即拍賣剩低75幅地皮。

法國租界

法國租界地皮凡24幅，每幅27公尺×42公尺。呢笪地皮一直丟空，直至1889年至著手發展，事緣法國喺歐州打敗仗，其時窮到仙都唔仙下。1889年4月新任法國領事于雅樂廢除外族禁售令，11月拍賣租界地皮。除預留3幅地皮楷嚟起法國領事舘，其餘21幅交成價介乎400至1000800銀錢，認真搶手，拍賣第一日21幅地皮隨即售罄。其中至大買家係英國遮士打先生，個人拍得九幅地。

喺之後嘅大半個世紀入面，英法兩國取得喺沙面島上嘅好多特權，政府相關機構同企業大量咁移入，主要嘅領事館同政治、金融組織都起喺呢度，並喺好長嘅時間入面畀咗附近嘅中國人好多唔公平嘅待遇，沙面因為咁成為後嚟中國乃至附近國家民族解放運動人士抗議同攻擊嘅目標。好似發生喺1920年代嘅廣州市民多次反殖民遊行，同埋越南革命者范鴻泰（Pham Hong Thai）對沙面法國領事館嘅炸彈襲擊等等。

1942年，日本向英國宣戰後，佔領沙面英租界，交咗畀親日嘅汪精衛政權（一般稱「偽國民政府」）。1943年，法國維希政權退出法租界，交咗畀汪精衛政權。嗰一年，堅持抗日嘅重慶國民政府另行同英國訂約收返英租界。二戰結束後，新成立嘅法國戴高樂政府正式宣佈將沙面法租界交返畀中華民國。