滿洲國臨時政府

出自維基百科,自由嘅百科全書
Jump to navigation Jump to search

滿洲國臨時政府,係2004年喺香港(有人話係紐約)建立嘅一個網絡國家[1],佢自稱係滿洲國大日本帝國佔領中國東北之後建立嘅附庸國)嘅流亡政府,要從中華人民共和國之中分離出佢聲稱嘅領土嚟復國,以復興滿族為主體嘅國家為目標[2][3],但有好多記者網民對滿洲國臨時政府嘅真實性同目的提出質疑[1]。佢聲稱嘅領土範圍包括東北三省內蒙古東部、河北北部同家陣屬於俄羅斯嘅外東北,「人口」有3600萬人,官方語言係滿文唐文[4][2]

至2019年3月,滿洲國臨時政府同喺美國為本部嘅「滿洲國亡命政府」合併為「滿洲國政府」。[未記出處或冇根據]

[編輯]

滿洲國臨時政府嘅網站奉溥儀皇帝,唔單止有元首首相,重聲稱佢嘅政府包括皇族同內閣,又用舊時嘅滿洲國國歌滿洲國國旗,重有年號「宣統[2][1]。佢聲稱響巴西意大利日本美國等地都設有海外支部。

自稱係滿州國臨時政府總理大臣嘅舊滿洲國遺睿鈕牯錄·愍鎊指出,臨時政府確實存在,喺2004年成立嗰時採取民主共和體制(由美籍滿人關學君出任攝政王),2006年底改為君主立憲制,有五名閣員[2]。滿洲國臨時政府係國際君主主義者會議嘅成員,亦都試圖加入非聯合國會員國家同民族組織[1]

2008年,滿洲國臨時政府舉辦咗一場選舉,以選出新嘅皇帝,由據稱係香港大學歷史系學生嘅愛新覺羅·孝傑當選,但係佢同愛新覺羅家族嘅關係受到質疑,因為佢嘅行輩「孝」字同族譜不合[1]。隨後,愛新覺羅·孝傑同臨時政府失去聯繫。2010年4月,臨時政府又主辦咗一次選舉,由愛新覺羅·崇基當選皇帝[5]。2011年5月,現任皇帝李志栓即位,同時Jason Adam Tonis獲選為首相[4]。至2015年8月,愛新覺羅獨立即皇帝位,任命鈕牯錄少幫為首相至2019年2月。

至2019年3月,滿洲國臨時政府同喺美國為本部嘅「滿洲國亡命政府」合併為「滿洲國政府」。總統由溥儀皇帝宗室溥君擔任。

經濟[編輯]

滿洲國臨時政府嘅中央銀行聲稱繼承咗滿洲中央銀行,貨幣滿洲國圓同美元有0.8嘅固定匯率,可以透過郵遞兌換[3]

2007年,滿洲國臨時政府聲稱可以用3美元買一張身分證,8美元買一本佢發行嘅護照,透過PayPal畀錢[3]。佢嘅網站重有賣滿洲國郵票,但係記者詢問嗰時,發言人表示郵票已經賣嗮[5]。呢尐經濟活動導致香港證券及期貨事務監察委員會希臘資本市場監察委員會(Hellenic Capital Market Commission)同西班牙證券市場委員會(Comisión Nacional del Mercado de Valores)喺2008年2月發佈警告,強調滿洲國臨時政府唔係一個可以發售投資工具嘅法人[6][7]

滿洲國臨時政府為咗籌措重建滿洲國嘅資金,開放納捐制度,捐美金五百就可以獲賜「公爵」嘅勳銜,捐美金一千以上可以做八旗旗領,名額只有五名,網站又販售前清黃龍旗、滿洲煙仔、溥儀畫像等等[2]

外界反應[編輯]

學者[邊個? ]指出,呢個係網絡世代虛擬實境嘅表現[2]有尐網民[邊個? ]懷疑成個網站係一場用來呃錢嘅騙局[1]

研究網絡中國民族主義嘅香港教育學院副教授沈旭暉對呢個組織表示懷疑,佢指出呢個組織聲稱要代表滿族人復興滿洲國,但係歷史上真正對滿洲國產生身分認同嘅人主要唔係唐人同滿人,而係日本人[5];佢又話成個網站可能根本只係惡搞[8]。不過,有部份媒體認為當年嘅八旗子弟的確有尐人等緊復辟,所以成立滿洲國臨時政府[1]

滿洲國臨時政府曾經喺2009年中華民國選舉期間引起媒體關注,因為佢有成員[邊個? ]可能係時任國民黨秘書長嘅滿族人金溥聰嘅遠親,甚至有媒體講笑噉話金溥聰係滿洲國臨時政府嘅特務[1][9]。滿洲國臨時政府嘅政治立場(例如支持達賴喇嘛藏獨,以及聲稱要擾亂2008年北京奧運)激嬲咗一尐中國網民[1]。中國大陸曾經有網絡傳言,聲稱滿洲國臨時政府嘅首相係日本間諜川島芳子嘅外甥川島志明,佢身兼台灣陳水扁政府嘅特務,響巴布亞新畿內亞煽動排華;學者沈旭暉認為呢個傳言子虛烏有,因為佢嘅網站聲稱嘅首相唔係川島志明[10]

參考[編輯]

  1. 1.0 1.1 1.2 1.3 1.4 1.5 1.6 1.7 1.8 "滿洲國復辟?金溥聰有個族人自封是皇帝", NOWNews, 2009-12-10, 喺2011-09-26搵到
  2. 2.0 2.1 2.2 2.3 2.4 2.5 "網路集資 籲重建滿洲國". 蘋果日報 (台灣). 2006年12月16號.
  3. 3.0 3.1 3.2 "騎呢滿洲國護照 8美元一本". 蘋果日報 (香港). 2007年7月3號.
  4. 4.0 4.1 "滿洲國臨時政府官方網站". 滿洲國臨時政府. 原著喺2013年3月5號歸檔. 喺2014年6月27號搵到.
  5. 5.0 5.1 5.2 沈旭暉 (2010年5月9號). "從互聯網「滿洲國皇帝全民直選」談起". 明報.
  6. Εταιρειεσ μη εχουσεσ αδεια παροχησ επενδυτικων υπηρεσιων βασει σχετικων προειδοποιησεων (public warnings) ξενων εποπτικων αρχων (PDF), Hellenic Capital Market Commission, 原著 (PDF)喺2012-04-02歸檔, 喺2011-09-26搵到
  7. "CNMV advierte tres compañías Hong Kong podrían dar servicios sin autorización", Estrategias de inversión, 2008-03-06, 喺2011-09-26搵到
  8. 沈旭暉 (2010年5月16號). "「太平洋滿洲獨立基地」﹕網絡稻草人的故事". 明報.
  9. 綠點 (2009年12月17號). "金溥聰是超極震撼彈". NOWnews.
  10. 沈旭暉 (2010年5月13號). "「滿洲國」參與巴布亞新畿內亞排華?". 明報.

連出去[編輯]