冇腳字

幾隻常見嘅英文冇腳字

  提示：呢篇文講嘅唔係黑體 (書法)。

冇腳字（英文：sans serif；書面語叫無襯綫字體），中文又叫黑體，喺排版同平面設計，泛指冇 ｢腳｣（同其他類似嘅修飾性筆劃）但係又唔係扮手寫字嘅字體；大概喺1816年左右喺西方印刷界出現。

冇腳字有時都會有少量嘅腳，例如用來分開冇腳嘅話就會完全分唔出嘅字（例如大楷 I、細楷 l 同數字 1）。

斜嘅冇腳字通常都唔會係正宗嘅意大利體，而係斜向字。

特別用途

喺無障礙設計，好多情況都會用到冇腳字。例如，可能會有規定，尋路系統上面用冇腳字。畀盲人摸嘅凸字（raised text）亦都會係冇腳字，因為有腳字用手摸會難摸。

名

冇腳字喺中文又叫 ｢黑體｣，係因為早期嘅冇腳字好似古黑體咁黑；以前英文亦曾經 ｢好多時｣ 叫 ｢gothic｣（即係哥德體，亦即係同古黑體撞名），日文亦承傳着zo2 ｢哥德體｣（ゴシック体‎）嘅叫法，反而喺英文圈， ｢gothic｣ 嘅叫法已經幾乎失傳。英文而今gaa1通常叫 ｢sans serif｣，睇落似法文，其實係英文；｢sans serif｣ 嘅叫法相傳係 William Caslon 喺1816年作嘅，而 serif 亦唔係法文，而係荷蘭文嘅借詞，原文 schreef，幼綫咁解；法文叫法其實係 ｢caractères sans empattements｣、｢linéale｣ 或者 ｢bâton｣。