特徵文字
特徵文字（粵拼：dak6 zing1 man4 zi6；英文：featural writing system）係文字系統嘅一種類型，指個系統嘅符號形狀唔係任意嘅，而係會將每個符號都設計到建基於佢對應嗰個音嘅語音學特性。
概論
[編輯]内文：文字
睇埋：語音學
舉個具體例子，諺文[e 1]就係一套好出名嘅特徵文字。諺文係一套字母，起源自李氏朝鮮，由朝鮮世宗李裪[e 2]响 15 世紀中帶領一批學者發明嘅。
廿世紀前嘅朝鮮族有用開漢字。漢字係包括粵語在內多數漢語傳統用嘅文字系統，漢字屬於語素文字[e 3]，好多字符都係以表達意思為主，會表示字詞或者形態素，而唔係講嘢嘅元音或者輔音。諺文就係純表音嘅（响呢點上似羅馬字），隻隻符號都表示緊元音或者輔音，唔帶有任何內置嘅意思。除此之外，諺文個做法，仲將啲寫輔音嘅符號設計到形狀似一個人讀嗰個音嗰時聲道嘅某啲狀態[1]，例子有
- ㄴ → 依個符號寫嘅係粵拼：n 噉嘅音，留意一個人發出 n 音嗰陣時條脷嘅形狀。
- ㄱ → 依個符號寫嘅係粵拼：g 噉嘅音，留意人發出 g 音嗰陣時條脷嘅形狀。
- ㅁ → 依個符號寫嘅係粵拼：m 噉嘅音，人發出 m 音嗰時嘴唇會合到實一實然後打返開。
下邊係圖解。
有關「唔同元音同輔音，發音嗰陣聲道狀態有咩分別」呢條問題，可以睇睇語音學，尤其係發聲語音學。
影響
[編輯]睇埋：識字率
諺文吸引咗好多語言學工作者留意：一般認為，好似諺文噉嘅特徵文字，做到字符設計到形狀上似聲道狀態。呢一點被指係令到特徵文字非常合乎直覺非常易學，能夠有效提升識字率。例如李氏朝鮮噉，就被指係發明咗諺文之後文盲率大跌[2][3]。
睇吓
[編輯]引述
[編輯]- ↑ What do the shapes in Hangul represent?. Britannica.
- ↑ How 15th-century King Sejong the Great helped make Korea literate. South China Morning Post.
- ↑ Handel, Z. (2016, May). Learn to read Korean: An introduction to the Hangul alphabet. In 7th Int. Particle Accelerator Conf. (IPAC'16), Busan, Korea.
拎
[編輯]- （英文） 韓國點樣打造咗一套正嘅字母 - 文字嘅歷史，一段 YouTube 片講到韓字嘅設計。