破地獄

  想搵差唔多名嘅港產片嘅話，請睇破·地獄。

破地獄係道教喪禮上超渡先人嘅科儀法事之一，破地獄意思係帶領先人從九層地獄出嚟，每一層地獄都有唔同嘅分工，並從而審判先人係咪犯過罪孽。

舊時傳統上，只有後生枉死嘅人先至需要破地獄，年老而自然離世嘅人就唔需要嘅；但有啲人會覺得成世人或多或少都有罪孽，所以都需要破地獄去超渡。

由來

破地獄相傳源於目連救母嘅民間故事，目連羅漢眼見亡母喺地獄受餓鬼之苦，得佛祖救咗亡母，因此破地獄唔單止揉合咗佛教誦經同道教儀式，亦符合中國儒家孝義嘅傳統。

儀式

喃嘸師傅喺靈堂中間地下放一個盆仔，盆外圍放九塊瓦片（代表九幽地獄）同放上寫咗先人個名嘅元寶，俗稱「開位」，然後燃點元寶。孝子會手抱先人嘅靈牌，道士就會帶領先人嘅親友圍住火堆誦經行幾個圈，跟住喃嘸師傅會圍住火團不停轉圈同誦經，用手上嘅木劍將瓦片逐塊打碎。喃嘸師傅將九塊瓦片打碎之後，表示亡者已經醒覺，為亡魂喺地府開路免受地獄受苦，早日轉世投胎轉世。